Zamołwići sportoweho towarstwa MSV Budyšin 04 su lětuši 27. měšćanski běh, kotryž bě za 12. september planowany, nětko tola wotprajili. W medijowej zdźělence rěka, zo njeje dale wotwidźeć, hdy budu wulkozarjadowanja zaso dowolene a hač hodźa so bjez wobmyslenjow přewjesć.

Přihotowanski team, sponsorojo a spě­chowarjo su so nětko zhromadnje na to dojednali běhanski podawk kompletnje wotprajić. Woni su sej zamołwitosće wědo­mi a chcedźa wosebje dźěći škitać, kotrež so kóžde lěto we wulkej ličbje na tradicionalnym sportowym wurisanju wobdźěleja. Pod hesłom „Budyšin so hiba – nětko ćim bóle!“ pak je za september šulerske běhanske wubědźowanje planowane.

Termin Budyskeho měšćanskeho běha za lěto 2021 hižo steji. Potom ma so 18. septembra přewjesć. Dalše informa­cije w interneće pod www.stadtlaufbautzen.de Kilian Hrjehor

Po dołhej přestawce móžachu młodźi koparjo Njebjelčanskeje SJ minjeny štwórtk zaso za bulom honić, byrnjež je­nož­ jednu hodźinu a z wotpowědnymi wotstawkami. Přiwšěm bě wjeselo wulke. Trening, kotryž přewjedźechu w skupinach z pjeć hrajerjemi, bě jara dokładnje přihotowany. K tomu słušeše wězo tež wotpowědne powučenje wšitkich dźěći a staršich. Tak dyrbja dźěći mjez druhim po separatnym puću na sport­nišćo přińć a je tak tež zaso wo­pu­šćić. Dalše předpisy hodźa so tohorunja derje dodźeržeć. Wšako móža za trening cyłe sportnišćo wužiwać.

Wosebje wobchad z bulom, techniske nadawki kaž tež koordinaciske a atletiske zwučowanja stejachu w srjedźišću treningoweje jednotki. Techniske wukubłanje budźe tuž dale w małych skupinach. Dwuboje a dalše zwučowanja z ćělnym kontaktom njehodźa respektiwnje njesmědźa so hišće přewjesć. Chwalić ma so w tym nastupanju disciplina koparkow a koparjow. Trening chcedźa nětko­ w tej formje dale wjesć.

84 procentow mjenje docho­dow formula 1 ma – tak steješe pjatk w powěsćach. Nětko hižo na to tukaja, zo budu ně­kotre předewzaća w naj­wuznamnišej klasy motorsporta přestać dyrbjeć, dokelž njemóža je bjez pjenjez finan­cować. Dilema to – a zdobom dalši krok, kiž wjedźe k wjetšej wostudźe na wubědźowanjach. Formula 1 njeje dawno hižo tak atraktiwna kaž před 15 do 20 lětami. Tehdy bě sobotniša rozmołwna tema kopańca, njedźelu wjerćeše so wona kołowokoło awtowych wubědźowanjow. Štó wě, što budźe z nowej sezonu a hač trjechi, zo chce Lewis Hamilton k Ferra­rijej? Chibazo je to taktika, kotraž ma w času tajkeje dołheje přestawki k wjace rozprawam wjesć. Njeje pak to zdobom tež šansa, snano sej koncept hišće raz přemy­slić, předźěłać a nowe ideje zapřijeć? Telko chwile k tomu najskerje tak spěšnje wjace njezměješ.

Poskićeja zaso kursy

Hoy-Reha, dnjowa klinika za rehabilitaciju a prewenciju we Wojerecach, poskića zaso sportowe kursy. Wšitke tak mjenowane suche kursy su we wulkich rumnosćach planowane, tak zo móža tam wotstawk dweju metrow dodźeržeć. Sport we wodźe pak budu jeno z maksimalnje šěsć wosobami přewjesć móc.

Akwafitnesowy kurs: Hdyž so we wodźe derje čujeće a chceće-li někotre punty­ wotbyć, swój krejny wobtok fit dźeržeć a swoje ćěło formować, wob­dźělće so na akwafitnesowym kursu: póndźelu, 11. meje (16.45, 17.30, 18.15 a 19.00 hodź.); wutoru, 12. meje (17.15 a 18.00 hodź.); štwórtk, 14. meje (17.00, 17.45, 18.30 a 19.15 hodź.).

„Bjezćežiće trenować“: Chceće swoje ćěło zaso na prawidłowne poćežowanje zwučić? Žedźiće so za pohibami, kotrež waše zhibadła njepoćežuja? Potom dowěrće zběhej (Auftrieb) ćopłeje wody a wuspytajće kurs akwagymnastiki: póndźelu, 11. meje (7.30, 8.15, 9.00, 9.45, 10.30 a 15.45 hodź.), wutoru, 12. meje (8.15 a 9.00 hodź.) a srjedu, 13. meje (9.30 hodź.).

Gymnastika za pónoj: Wěsće wy, zo a kak móžeće swoju pónoj (Becken) hibać a kak wona tež bjedro (Hüfte) wob­wliwuje? Jeli nic, da pospytajće so wutoru, 12. meje (18.00 do 19.00 hodź.).