Prěnje koparske mustwo muži FSV Budissy Budyšin ma nowy trenarski team. Spočatk sezony 2024/2025 přewozmje Steve Dieske funkciju šeftrenarja. Pódla njeho budźe Eric Prentki jako kotrenar trenarski cyłk Budyšanow wudospołnić.

Wuhibki za nowu sezonu su stajene: Steve­ Dieske stanje so z šeftrenarjom 1. muskeho mustwa FSV Budissy Budyšin. Eric Prentki přewozmje hamt kotrenarja.

Awtor dźensa

Jan Bogusz

Za kóždeho fana a kóždu fanowku kopańcy budu přichodne tydźenje zawěsće cyle wosebite. Z hru Němskeje přećiwo Šotiskej w Mnichowje su zašły pjatk koparske europske mišterstwo w kraju zahajili. Na kóncu so mustwo trenarja Juliana Nagelsmanna z přeswědčacym 5:1 přesadźi. Start je so potajkim poradźił. Je to zdobom wěste wolóženje, wšako mějachu Němcy w zašłych turněrach runje w prěnjej hrě ćeže. Wočakowanja na mustwo su lětsa wězo wosebje wulke. Tež je euforija přibyła. Njeličomne reportaže su w předpolu přihoty na wosebity turněr ze wšelkich perspektiwow předstajili a w medijach sonja­ samo wo „Lěćnej bajce 2.0“. Hač tomu tak budźe abo nic, abo hač so tute sony hišće pře­trjechja, je hišće wote­wrjene.

Sport ze zapřahami

Konjace sportowe towarstwo „Při Klóšterskej wodźe“ Pančicy-Kukow přewjedźe jutře, sobotu, a zajutřišim w Chrósćicach konjacy turněr ze zapřahami. Wšelakore wurisanja tam wotměja: třeći sakski młodźinski cup, kwalifikaciju za dny dobyćerjow w Moritzburgu, Sakske mišterstwa w jězdźenju z ponyjom, kaž tež Durinske mišterstwa za dwupřežne konje/ponyje. Sobotu sportuje so w Chrósćicach wot 8 hodź. hač do popołdnja a njedźelu hižo wot 7.30 hodź.

Lěćny sportowy swjedźeń

W Pančicach-Kukowje swjeći Sportowe towarstwo Marijina hwězda jutře swój lěćny sportowy a inkluziski swjedźeń. Tón započnje so w 9 hodź., wot 10 hodź. su swójby na sportowy areal witane a wot 14.30 hodź. změja tam kofej a tykanc. Poł hodźiny pozdźišo započnjetej so bičwolejbulowy turněr a kopańca, hdźež hraja młodźi přećiwo starym. Lěćny swjedźeń wuklinči wječor z rejemi.

Wohnjowi wobornicy w Salowje

Wubědźowanje dobrowólnych wohnjowych wobornikow w nadběhu hašenja budźe njedźelu w Salowje. Dalše wurisanja wobornikow: 21.06.24 Koćina / 21.06.24 Skaskow / 09.08.24 Sernjany / 18.08.24 Sulšecy / 23.08.24 Pěskecy / 24.08.24 Róžant / 01.09.24 Smjerdźaca / 13.09.24 Ralbicy

Jědnaty raz wotmě so zašły štwórtk, 6. junija, w Budyšinje sportowy swjedźeń zakładnych šulow w lochkoatletice. Mjez wobdźělnikami běchu mjez druhim Budyska serbska zakładna šula, Radworska serbska zakładna šula a Worklečan serbska zakładna šula. Nimo stafloweho běha so šulerki a šulerjo w starobnej klasy rodźenych 2016 do 2013 w sprinće na 50 m, dalokoskoku, bulikimjetanju a sprinće na 800 m wubědźowachu. Wšitke wuměnjenja kaž wjedro abo wosebje orga­nizacija Wuchodosakskeho lochko­atletiskeho towarstwa běchu přewšo dobre.

Sportowe zarjadowanje so ze staflowym běhom započinaše. Tam wudobychu sebi Worklečenjo Wanda Matkec, Elias Jakubaš, Sofija Ričlec, Julius Čornak, Luiza Zarjeńkec, Jakub Bětnar, Helena Brězanec a Ludwig Jakubaš, po druhim městnje loni, lětsa złotu medalju.

Tež w jednotliwych disciplinach běchu šulerki a šulerjo jara wuspěšni. Złoto wudobychu sebi Helena Brězanec a Julius Čornak na 50 m kaž tež Elias a Ludwig Jakubaš na 800 m. Tadej Cyž