Pokalna koparska hra

Dźensa wječor wočakuje regionalny koparski ligist Budissa Budyšin na Młynkec łuce w pokalnym kole Kamjeničanski FC, kotryž hraje klasu wyše w třećej lize. Zakop štwórćfinalneje partije je w 19 hodź.

Sakska přećiwo Pruskej

Wutoru, 15. nowembra, wotmějetej Pěskečanska a Sulšečanska młodźina koparski duel „Sakska přećiwo Pruskej“. Hrać budu w Pěskecach, a to wot 18.30 hodź. pod swětłomjetakami.

Prěni tabulki přećiwo druhemu

Volleyballisća prěnjeho mustwa Viktorije Worklecy hraja jutře w sportowej hali Serbskeho šulskeho a zetkawanskeho centruma w Budyšinje. Načolnik wobwodneje ligi wočakuje tam JTVG Koblicy, druheho tabulki, wot 14 hodź.

Pjasćowanska nóc

Třeću pjasćowansku nóc přewjedu pjasćowarki a pjasćowarjo Pósta Germanije Budyšin sobotu, 26. nowembra, w sportowni na Budyskim Třělnišću. Pjasćowanske boje budu tam wot 18.30 do 24 hodź. Zastupne lisćiki za wosom eurow poskićeja Budyscy pjasćowarjo w předpředani w treningowej hali na Jana Skalowej 65. Tam móžeće jim wotydźenja, nimo wutory, wot 17 do 19 hodź. tež při treningu přihladować.