Za dwě njedźeli hotuja so Serbja skónčnje zaso na koparske mišterstwa europskich narodnych mjeńšin europeadu. Tak znajmjeńša bě lońši plan. Přišło pak bě hinak a hačrunjež zdadźa so incidency w zwisku z koronu zaso tajke być, zo hodźi so chutnišo wo wjetšich zarjadowanjach diskutować, dźeržu dalše přesunjenje, mjenujcy na klětu, tež nětko hišće za najmudriši rozsud. Kopańcu pod wěstymi wuměnjenjemi bychu snano tež hižo loni w Korutanskej hrać móhli. Europeada pak je wjace hač jeno za bulom honić, je mjezynarodne kulturne schadźowanje. A to, štož najbóle k tomu słuša, su fanojo, kotřiž spěwaja, rejuja a swój lud reprezentuja.
Nowe digitalne wupokazy
Wupokazy sudnikow Zapadołužiskeho koparskeho zwjazka kaž tež wšitkich dalšich koparskich zwjazkow w Sakskej wot 1. julija 2021 hižo njepłaća a njebudu tež podlěšene. Zamołwići Sakskeho koparskeho zwjazka přihotuja tučasnje nowe digitalne wupokazy za sudnikow.
Terminowa protyka WFV
W swojej terminowej protyce za měsac junij ma Zapadołužiski koparski zwjazk (WFV) wjacore onlinowe terminy:
08.06. infowječor Němskeho koparskeho zwjazka (DFB)
11.06. posedźenje předsydstwa Sakskeho koparskeho zwjazka (SFV)
15.06. infowječor DFB
22.06. posedźenje předsydstwa WFV
22.06. infowječor DFB
29.06. infowječor DFB
30.06. přizjewjenje mustwow za hrajnu dobu 2021/2022
Planuja do čorneho
Ramikowe plany sportowych koparskich towarstwow za nowu hrajnu dobu bychu mjeztym dawno hižo na blidach leželi abo wozjewjene byli, njeby-li pandemija była. Prěni pospyt do čorneho bjez garantije kroči nětko Zapadołužiski koparski zwjazk (WFV). 14./15. awgusta ma so sezona 2021/2022 za muži započeć a 4./5. septembra za žony a za dorost.
Přizjewjenja dale móžne
Pólska ekstraklasa je najwyša koparska liga w susodnym kraju. W njej hraješe dotal 16 mustwow wo mišterstwo. Wona bu 1927 załožena a wobsteješe wot lěta 1928 do 2005 pod třěchu Pólskeho koparskeho zwjazka (PZPN). Wot 2005 ma zamołwitosć za ligu nowozałožena akcijna towaršnosć Ekstraklasa S.A.
Hrajny modus so w Pólskej wot tych susodnych krajow trochu rozeznawa. Mustwa hraja najprjedy dwójce přećiwo sebi. Po tak mjenowanym zakładnym přechodźe so liga do dweju dźělow rozrjaduje: Najlěpše wosom teamow wubědźuje so w mišterskim kole, dalše wosom kraje přećiwo zestupej. Za mišterske koło kwalifikowane koparske cyłki njemóža so špatnišo zaměstnić hač na wosme městno. Na tamnym boku njemóža so teamy w zestupnym kole lěpje hač na městno dźewjeć polěpšić. W kónčnymaj kołomaj nastupja mustwa potom jenož jónu přećiwo sebi, tak zo přińdźe kóžde na 37 dypkowych hrow w sezonje.
21. februara 2020 je PZPN wozjewił, zo matej so hrajny modus a ličba mustwow wot sezony 2021/2022 změnić. Město 16 smě w ekstraklasy 18 cyłkow hrać, a to na 34. hrajnych dnjach. Mišterske a zestupne koło w Pólskej hižo njezměja.
Zašo hač pola nas skónči so 16. meje w Pólskej koparska sezona. Byrnjež so dypkowe hry korony dla pozdźišo započeli, njeběchu nětko nalěto hry w mišterskim kole resp. w zestupnym kole časowje móžne. Dokelž změja w najwyšej hrajnej klasy přichodnje 18 mustwow, lětsa jenož jeničke zastupnistwo zestupi. Hakle loni bě so Bielsko-Białej postup poradźił, nětko zaso dele dźe.
A runje pola načolnika tabulki a wot předposlednjeho hrajneho dnja hižo jasneho mištra Legije Waršawy dyrbješe nošer čerwjeneje latarnje nastupić. W stolicy wšak hosćićel runje štomy njezwutorha a so ze snadnym 1:0 spokoji. Jeničke wrota docpě nadběhowar Kapustka. Po hrě pak wjacore tysacy přihladowarjow noweho-stareho nošerja titula wulce sławjachu. Wicemišterstwo wuwojowa sej Częstochowa, přewinywši Pogoń Szczecin z 3:1.
Loni je město Budyšin spěchowanje sporta z 30 000 eurami podpěrało. 10 000 eurow dósta MSV Budyšin 04 za přitwar a wuhotowanje funkciskeho twarjenja w sportowym parku. Nad runje telko pjenjezami móžachu so pola Pósta Germanije Budyšina wjeselić a zatwarichu krjepjensku připrawu na trawniku. Dalše 10 000 eurow dósta Budissa Budyšin za přetwar wobswětlenja na trawniku při bróžni na LED. Wšitke twarske naprawy su mjeztym zakónčene.
FSV Budissa Budyšin wobhospodarja w Humboldtowym haju swójski koparski sportowy centrum. Z wjacorymi trawnikami, mjez nimi jednym kumštnym, z připrawu za streetsoccer, z třomi tenisowymi polemi kaž tež jednym wolejbulowym hrajnišćom skići tak trěbne wuměnjenja za wšědny trening. Runje nalěto a nazymu njeběchu wuměnjenja ze swěcu na trawniku při bróžni runjewon dobre.
„Moja lubosć, moje towarstwo, moja Hornja Łužica – zhromadnje wuspěšni za naš region“ rěka hesło, pod kotrymž su přiwisnicy FC Hornjeje Łužicy zjednoćeni. Sportowe towarstwo prosy fanow a podpěraćelow wo pomoc, dokelž ma wone najebać přestawku dale wulke wudawki. Tež někotři sponsorojo njemóža zrěčenja hižo spjelnić. Kóždy smě sej wotnětka tikety w štyrjoch kategorijach kupić, wšojedne hač fan, sympatizant, staršiski dźěl, přihladowar abo předewzaćel. Kelko lisćikow a z kotreje kategorije je, přewostajeja kupcej. Złoty lisćik płaći 50, slěborny 30, bronzowy 20 a „hornjołužiski“ dźesać eurow.
Nazběrane pjenjezy chcedźa za nakup małeho busa za dorost wužiwać. Wobstarać móžeće sej tikety online z přepokazanku na konto FCO, pola Lutowarnje Hornja Łužica-Delnja Šleska, IBAN: DE15 8505 0100 3000 0818 94. Na městnje wužiwanskeho zaměra podajće prošu pomjenowanje tiketa, swójske mjeno a adresu, dokal dyrbja lisćik pósłać. SN
Spočatk meje je Jan Macka z Chrósćic hižo wobšěrnje wo Sportowej jednotce Chrósćicy (SJC) rozprawjał. Wšako swjeći wona lětsa swoju 40. róčnicu wobstaća. Dźensa wěnuje so Macka kopańcy žonow w SJC.
Gmejnske swjedźenje w Chrósćicach nastupajo měješe sportowaca młodźina přeco dobre ideje. Tak tež sobotu 18. junija 1994, hdyž přeprosychu sej domjace holiča swoje přećelki z Ralbic na koparsku hru. Rjane dobyće z 2:0 poradźi so Chróšćankam k zazběhej, a to pod „Gustlom“. Tak mjenowachu swojeho trenarja Krystofa Zahrodnika. Wrota třěliłoj běštej Sabina Schirmacherec a Beata Zyndźic. Dźeń po tym, njedźelu, młode Chróšćanske mustwo znowa nastupi: nětko na swjedźenskej łuce při Satkuli před tójšto přihladowarjemi přećiwo Chróšćanskim žonam. Znowa poradźi so jim dobyće 1:0, wrota docpě Maren Zyndźic. Bórze na to wutwori so holči koparski cyłk, kiž měješe wotpohlad, so w přećelskich hrach wubědźować. Wuběr koparkow bě dosć dobry, dokelž wustupowachu hłownje na małych hrajnišćach.
SV Wehen-Wiesbaden –
Dynamo Drježdźany 0:1 (0:1)
Zestawa hosći: Broll – Kwadwo, Will, Ehlers, Meier (46. Löwe), Kade, Stark, Königsdörffer (51. Diawusie), Sohm (46. Mörschel), Vlachodimos (67. Stor), Daferner (46. Hosiner)
Postup do druheje najwyšeje ligi Němskeje běchu sej Drježdźanscy koparjo hižo w partiji přećiwo Türkgücü Mnichowej zawěsćili. Přećiwo mustwu Wehen-Wiesbaden su so hišće raz stopnjowali a dalši raz dobyli. Lochko pak jim to konkurent nječinješe. Tež domjacy chcychu mjenujcy hrajnu dobu rady z wuspěchom zakónčić.
Zestawa 2. ligi w sezonje 2021/2022
Werder Bremen
FC Schalke 04
Holstein Kiel
Hamburgski SV
Fortuna Düsseldorf
Karlsruheski SC
SV Darmstadt 98
1. FC Heidenheim
SC Paderborn 07
FC St. Pauli
1. FC Nürnberg
FC Rudne horiny Aue
Hannover 96
SSV Jahn Regensburg
SV Sandhausen
Dynamo Drježdźany
Hansa Rostock
FC Ingolstadt 04