Z bojownosću zastatk wurunali
SJ Njebjelčicy
– HZ Ottendorf/Liegau 2:2 (0:2)
Zestawa domjacych: Hahn – Šołta (46. Kral), Haška, Hrjehor, Dubaw, Cyž, Hommel, Hanuza (90. Hoier), Lejnart, Čornak (87. Mjechela), Hoelzel
To bě z wotstawkom dotal najlěpša hra Njebjelčanow. Byrnjež koparjo Njebjelčanskeje SJ hižo po 22 mjeńšinach z 0:2 w zastatku byli, so cyłk kapitana Krystofa Dubawa hóstnym koparjam njepoda. Z přewšo strašnym a spěšnym nadběhowarjom Ricom Kühne, kotryž docpě tež woboje wrota (12., 22.), započachu hosćo partiju spěšnje a z połnej energiju. Po tym pak so hrajerjo trenarja Detlefa Panica zhrabachu a sej sami někotre strašne šansy wuhrachu. Prěnjej měješe Robert Lejnart. Wuspěch pak wón z tym hišće njeměješe. Najprjedy wotpopadny wrotar hosći Lejnartowu třělwu z połneho běha (32.) a tež wólny kop dwě mjeńšinje po tym puć do wrotow njenamaka. Pjeć mjeńšinow do přestawki přesadźi so Lejnart hač do šěsnatki a wuhra wrotarja. Bul pak suny snadnje nimo žerdźe.
Wuslědki (22.10.15)
Wokrjesna koparska liga, stafla III
Kamjenc II – Marijina hwězda 2:0 (1:0)
Großröhrsdorf II – Sepicy 5:1 (4:0)
Arnsdorf – Frankenthal 1:1 (1:0)
Großdrebnitz – Němske Pazlicy 1:4 (1:1)
Großnaundorf – Hlinowc 2:3 (1:2)
Haselbachtal – Großharthau 3:1 (2:0)
Njebjelčicy – Ottendorf/Liegau 2:2 (0:2)
1. Arnsdorf 8 25 : 7 17
2. Großröhrsdorf II 8 13 : 6 16
3. Frankenthal 7 18 : 13 16
4. Großnaundorf 8 28 : 11 15
5. Njebjelčicy 8 20 : 14 14
6. Ottendorf/Liegau 7 14 : 8 14
7. Hlinowc 7 19 : 11 13
8. Marijina hwězda 7 21 : 16 10
9. Haselbachtal 8 20 : 23 10
10. Kamjenc II 8 9 : 20 9
11. Němske Pazlicy 7 9 : 10 8
12. Sepicy 7 15 : 26 6
13. Großdrebnitz 8 7 : 28 6
14. Wóslink/Skaskow 7 12 : 23 4
15. Großharthau 7 9 : 23 3
Štwórty raz dumperowy mišter
Minjenu njedźelu staj wón a jeho team wulce juskałoj. Štwórty raz bě sej Róžeńčan Filip Kral (Dumperowy klub Lejno) krónu najlěpšeho dumperowca Němskeje zawěsćił, jako docpě na poslednim wubědźowanju 2015 w Lieschowje na Rujanach najlěpši čas. Jurij Bjeńš je so dźeń pozdźišo z 25lětnym dobyćerjom rozmołwjał.
Gratuluju k triumfej. Kak dołho sće jón swjećili?
F. Kral: Party traješe hač do ranja w dwěmaj. Smy dźensa hišće wšitcy poměrnje mučni a wučerpani. A to nic jeno swjećenja, ale wězo tež napinaceho wubědźowanja dla …
..., kotrež sće při Baltiskim morju dobył. Cyle sprawnje, sće spočatk sezony do toho wěrił.
F. Kral: Pokal běše wězo cyły čas mój zaměr, wšako sym tež hižo do toho trójce cyłkowne hódnoćenje dobył. Jako pak so w prěnim wubědźowanju w Adelsdorfje z dumperom přećisnych, wšak wjac tak prawje do pokala njewěrjach, wšako běchu wuslědki minjene lěta stajnje jara snadne a wuske. Na zbožo pak mějachu tónraz tež konkurenća tróšku njezboža, a tak wuwojowach sej we wubědźowanjach hišće dosć dypkow.
Módro-běli jubilej swjećili
Sportowa jednotka DJK Módro-běli Kulow je minjenu sobotu 90. róčnicu załoženja woswjećiła.
Mjez čestnymi hosćimi jubilejneho swjedźenja běštaj předsydka zwjazkoweho zjednoćenstwa DJK Elsbeth Beha a jednaćel Budyskeho sportoweho zwjazka Lars Bauer. Na zarjadowanju w sportowej hali wobdźělichu so wšitcy čłonojo, sponsorojo kaž tež zastupjerjo z politiki a hospodarstwa.
We wobłuku třihodźinskeho programa předstajichu farar dr. Wolfgang Křesák, lěkar Rolf Hesselbarth a tuchwilny předsyda sportoweje jednotki Hubertus Szczepaniak stawizny Módro-běłych Kulow wot lěta 1925 do 2015. Kulowska rejwanska skupina a karnewalistaj Thomas Prüfer a Marion Grellert postarachu so wo wotměnjawy program.
Wjeršk běše wuznamjenjenje sportowcow. Hnydom šesćo dóstachu slěbornu čestnu jehličku. Lars Bauer počesći měšćanostu Uda Popjelu w nadawku Krajneho sportoweho zwjazka ze slěbornej jehličku. Předsyda Hubertus Szczepaniak dósta z rukow prezidenta Zapadołužiskeho koparskeho zwjazka Axela Görnera złotu jehličku. W. Müller
Wo jedne městno so polěpšili
TSV 90 Wjazońca
– ST 1922 Radwor 1:4 (0:2)
Zestawa hosći: Wróbl – Bauer, Buša, Stephan Henke, Karwin, Šram, Zähr, Nuk, Wjenka (86. Omran), Mark (62. Kral), Winar
Dypki sprawnje rozdźělene
HZ Hórnikecy
– Sokoł Ralbicy/Hórki II 0:0
Zestawa hosći: Měškank (20. J. Matka) – Čórlich, Mě. Matka, Zynda, Bogusz, Róbl, Bernard, Kobalc, Šěn, Šołta (46. Kř. Matka), Mět (70. Šmit)
Wobě koparskej mustwje běštej a stej w pincy tabulki wokrjesneje ligi stafla II susodaj. Tak běše njewěstosć wobeju spóznajomna. Hórnikečenjo běchu dwójce strašni přez hłójčkowanej bulej Zablockeho a Marka. W 20. min. zrani so wrotar Sokoła Měškank a dyrbješe hrajnišćo wopušćić. W chorowni zwěsćichu ćežke naraženje ramjenja. Přejemy jemu bórzomne wustrowjenje. Jeho zastupowaše Jurij Matka a młody Čórlich bu jako nadběhowar zaměnjeny.
W druhim połčasu wotměwaše so hra dale mjez šěsnatkomaj a wobě mustwje sej někotre šansy wuhraštej. Tak w 54. min., jako Jurij Matka dźeržeše. Z přichodnym nadběhom móhli Sokoljo nawjedowanje docpěć. Tola Mětej čuwy zaprajichu a wón na wrotarju zwrěšći. Rjadaj škitarjow dominowaštej. Tež žołtočerwjena karta za Hórnikečanskeho hrajerja ničo na tym njezměni. Pozitiwne je, zo Sokoljo prěni raz w sezonje žane napřećiwne wrota njedóstachu.
Standardnej situaciji koparsku hru rozsudźiłoj
Jednota Kamjenc II
– ST Marijina hwězda 2:0 (1:0)
Zestawa hosći: O. Schmidt – Wróbl, Łušćanski, T. Jurš, Rab, P. Schmidt (53. Bětnar), Bělk (46. Škoda), D. Jurš, Peschmann, Winkler, Pakoßnick
Na wosmym hrajnym dnju we wokrjesnej koparskej lize mějachu hrajerjo ST Marijineje hwězdy w Kamjencu ćežki nadawk zmištrować. Hnydom štyrjo koparjo z kadra krajneho ligista Kamjensku rezerwu zesylnichu. Hižo w 5. min. dóstachu domjacy wólny kop. Kloß hrabny sej bul a přewiny Olivera Schmidta ze zdalenosće 17 metrow k 1:0. Erwin Kleinmann bě swojich chowancow cyle derje nastajił. Hakle po dwaceći mjeńšinach poradźi so hosćom tróšku ćišća na wrota Arnolda. Najprjedy bě tón při třělwje Falka Peschmanna hišće z porstami při bulu, krótko po tym wotwobara wón kop Dawida Jurša.
Jenož dypk
TSV Połčnica
– Sokoł Ralbicy/Hórki 1:1 (0:0)
Zestawa hosći: Gloxyn – von Köding, Schultz, B. Bjeńš, F. Bejma, Šołta (64. Wałda) S. Bjeńš, B. Bejma, Korjeńk, Kurjat (82. Bejmak), Domaška
Koparjo z poprjancoweho městačka su Sokołej Ralbicy/Hórki njepřijomny přećiwnik. Woni wustupuja jara robustnje a zasadźeja hłownje ćěło, zo bychu so wobarali. Tež sobotu tomu tak bě. Mokre hrajnišćo tomu hišće polěkowaše. Hižo po štwórć hodźinje móhł Bosćij Bejma wrota třělić. Wón wuhra dweju Połčničanskeju škitarjow, wrotar pak kop ze sylnej paradu wotwobara. Po poł hodźinje nahra Šołta na prawym boku Korjeńka, kiž trjechi jenož łatu.
Sakski volleyballowy dorost starobneje klasy U16 je zwjazkowy pokalny ...
Najprjedy we Łužicy hrali
FSV Budissa Budyšin
– VfB Auerbach 1:1 (1:1)
Zestawa domjacych: J. Jakubov – Kolan, Klippel, Patka, Kral (26. Heppner), Hoßmang, Reher (65. Hansch), Rosendo, Čermák, Salewski, Walther (87. Fröhlich)
Budissa Budyšin a VfB Auerbach wotměštej wčera partiju regionalneje koparskeje ligi, kotruž bychu poprawom sobotu w Auerbachu přewjesć měli. Na tamnišim přemačanym kopanišću pak njehodźeše so hrać.
Šeftrenar Budissy Tomaš Henčl wědźeše, zo njebudźe to lochki nadawk. Najebać to wón wězo chcyše, zo dypki doma zdźerža. Prěnju móžnosć pak mějachu hosćo. Wrotar Jakub Jakubov a škitarjo Budissy mějachu najprjedy raz tójšto dźěła. Njepřekwapi tuž, zo Auerbach hižo zahe nawjedowaše (13.). Třělwu Rehera do šěsnatki pak Lambach štyri mjeńšiny z ruku zadźerža. Jědnatku přetwori Hoßmang zymnokrejnje k 1:1 (17.). Auerbach pak bě w prěnim połčasu lěpše mustwo a měješe hišće dwě wjetšej móžnosći na wrota (23., 28.).
