Na lětušim Budyskim běhu z wutrobu je so wjace hač 2 000 šulerjow a wučerjow wobdźěliło. Zhromadnje naběhachu na Budyskej Młynkec łuce nimale 26 000 eurow za dobry zaměr.

Mjeztym hižo 13. Budyski běh z wutrobu we hłownej organizaciji Ludoweje banki Budyšin wotmě so minjeny pjatk w stadionje Budyskeje Młynkec łuki. Dokelž na tradicionalnym městnje před Schillerowym gymnazijom twarja, startowachu běharjo z Budyskich gymnazijow kaž tež Wjelećanskeho a Biskopičanskeho gymnazija a powołanskeje šule za hospodarstwo a techniku Budyšin na nowym terenje. Sportowcy zmištrowachu wulkotne 13 636 kołow, kóžde něhdźe 600 metrow dołhe. Teamy wobstejachu stajnje z třoch běharjow, kotřiž so wotměnjejo jednu hodźinu za dobry zaměr angažowachu. Naběhanu sumu 25 959,84 eurow přewostaja lětsa towarstwu Regenbogen e.V. z Biskopic.