Njewšědne časy kazaja sej njewšědne naprawy a kreatiwne ideje. Wjele sportowych po­daw­kow bu wotprajenych abo do na­zymy přesunjenych. A smědźa-li tola być, da pod krutymi hygie­nowymi předpisami. Swobodny stat Sakska je aktualizowane po­sta­jenja wudał. Pod dypkom 10 steja wažne­ infor­macije za sportowe towarstwa a fitnesowe centery.

Nimo powšitkownych před­pisow je kóždy sportowy zwjazk, tak tež wolej­bulowy, hišće přidatne poručenje wudał. Porno znatym předpisam hygieny dyrbja wolej­bulisća kóždy bul po treningu desinficěrować resp. dokładnje wučisćić. Je-li móžno, dyrbja trening abo dźělne zwučowanja wonka přewjesć. Za wubědźowanja płaći přeco hišće zakaz přihladowarjow. Tež mustwa maja na maksimalnu ličbu wosobow kedźbować. Tak je za kóžde jenož wěste mnóstwo trenarjow a zastaraćelow dowolene. Je to wužadanje za kóždeho jednotliwca.