Budyšan Jurij Nuk je čas spočatk lěta, kotryž je nimale bjez sportowych wuslědkow, wužił, zo by wo stawiznach swětowych lochkoatletiskich mišterstwow rozprawjał. Nuk bě a je sam zahority lochkoatlet. We wysokej starobje wobdźěla so wón přeco hišće na běhanskich wubědźowanjach we Łužicy.
1995 Göteborg
W znatym a rjanym šwedskim přistawnym měsće Göteborg wubědźowachu so 1 804 atleća ze 191 krajow, a to běše rekordne wobdźělenje. Titul swětoweho mištra wubědźichu sej sportowcy ze 24 krajow. Wosebje wusahowaštej wukonaj swětoweju rekordnikow w trojoskoku. Pola muži doby Jendźelčan Jonathan Edwards z 18,29 metrami, pola žónskich Ukrainjanka Inesa Krawjec z 15,50 metrami. Wobaj wukonaj běštej swětowej rekordaj. Tež atletka Kim Batten z USA polěpši w Göteborgu swětowy rekord na 400 m přez płótki na 52,61 sek. Jeje krajan Michael Johnson wuwojowa sej dwójce titul swětoweho mištra, a to na 200 m (19,79 sek) a na 400 m (43,39 sek). Kubačan Iván Pedroso doby swoju prěnju złotu medalju w dalokoskoku z 8,71 metrami.
1997 Athen
