Wonka dotal jenož wuspěšni

wutora, 24. septembera 2019
artikl hódnoćić
(0 )
Prěnju sezonu w rjadach koparjow Sokoła Ralbicy/Hórki a hižo stajny hrajer: Alexander  Wałda z Pěskec (tu w hrě přećiwo młodźinje A Budissy  Budyšin) je hižo kruty wobstatk škita wokrjesneho wyšeho ligista. Foto: Jörg Stephan Prěnju sezonu w rjadach koparjow Sokoła Ralbicy/Hórki a hižo stajny hrajer: Alexander Wałda z Pěskec (tu w hrě přećiwo młodźinje A Budissy Budyšin) je hižo kruty wobstatk škita wokrjesneho wyšeho ligista. Foto: Jörg Stephan

TSV Wachau – Sokoł Ralbicy/Hórki 1:2 (1:0)

Zestawa hosći: Schöne – K. Matka, Schultz, Wałda, Lešawa (46. Domaška), Šewc, Rawš, Gloxyn, Korjeńk, M. Matka (89. Šiman), Kurjat

Koparjo Sokoła Ralbicy/Hórki poda­chu so minjenu sobotu jako faworit k postupnikej do Wachauwa. Hra bě wot spočatka do kónca wurunana a tak nasta prawy fight wot prěnjeje do poslednjeje mjeńšiny. Trenarjej Chrystofej Gloxynej znowa někotři hrajerjo pobrachowachu, ale wulkeho kadra dla to jara njenapadny. Delanscy bulkoparjo njenamakachu prawje do hry, jenički nadběhowar Gabriel Kurjat bě prědku kaž zhubjeny a tak dósta jenož mało bulow. Hrajerjo z Wachauwa spytachu Sokołow z měnjatym pressingom mjerzać a tak dyrbjachu hižo po 20 mjeńšinach prěnje wrota dnja přijimać, jako po rjanej kombinaciji domjacy Marlon Fischer mudrje přetwori. Tež Sokoljo mějachu w prěnim połčasu hišće dwě dobrej składnosći, tola wobě njeń­dźeštej do wrotow.

Po měrnej narěči Gloxyna w kabinje startowachu Sokoljo po połčasu kaž natřěleni. Fabian Korjeńk a Pětr Domaška hraještaj nětko w nadběhu, Kurjat w srjedźnym polu. Runje mjenowany Korjeńk trjechi dwě mjeńšinje po znowazahwizdanju jeno žerdź, dwě dalšej mjeńšinje pozdźišo pak móžachu hosćo skónčnje wyskać. Domaška předrě so w šěsnatce přećiwo dwěmaj škitarjomaj a bul hižo zhubi. Tón pak tak spodźiwnje na kumštnym trawniku wotskoči, zo kulowatu kožu zaso měješe a ju poł ležo do wrotow prasny. Wupadaše tak, zo dźěše ta pódla wrotow, tola znowa dósta njesměrny effet a so z wida Sokołow zbožownje do čorneho kuleše. Spodźiwne to wrota, za to pak jara wažne. Přetož Ralbičenjo nětko dale tłóčachu. W 55. min. trjechi Korjeńk nawjedowanje. Denny Gloxyn třěli wólny kop na wrota, domjacy wrotar daše jón słabje wotplacnyć, Korjeńk­ steješe na prawym blaku a kopny jón do delnjeho kuta. Nětko tež hrajerjo z Wachauwa zaso wotućichu, ale stoprocentne móžnosće sej žane njewuhrachu. Na tamnym boku mějachu hosćo hišće štyri jara dobre składnosće, wuslědk zwyšić. Tež standardy w poslednich mjeńšinach Ralbičenjo wšitke ze šěsnatki zhłójčkowachu a tak wosta při snadnym, ale hladajo na stopnjowanje w druhim połčasu zasłuženym wonkownym dobyću 2:1. Přichodny tydźeń přijědźe zestupnik a tabulkowy susod z Hornjeho kraja/Sprjewje do Delan. To budźe za­jimawe mocyměrjenje na podobnym niwowje­. Jurij Bjeńš

wozjewjene w: Sport
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND