Poslednja scena hru rozsudźiła

wutora, 24. septembera 2019
artikl hódnoćić
(0 )

SJ Njebjelčicy – FSV Łuty 5:6 (2:4)

Zestawa Njebjelčic: Matješk – Kral, Hanuza, Gödig, Hölzel, Pawlik (74. Domš), Čornak (33. Hrjehor), Haška, Korjeńk, Wagner (46. Lejnart)

K dalšej domjacej dypkowej hrě bě prěnje mustwo SJ Njebjelčicy cyłk z Łutow do swojeho stadiona při Jaworskej hrjebi witało. Hosćom poradźi so perfektny start do hry. Paul Schöps dósta bul po zakopje a někotrych stacijach do běha a měrješe so samlutki na wrota. W dwuboju z wrotarjom so Schöps ze sylnym kopom k nawjedowanju přesadźi (2.). Njetraješe dołho, zo nasta podobna kombinacija. Tom Liening k 0:2 přećiwo Józefej Matješkej we wrotach Njebjelčanow (4.) přetwori. Njebjelčenjo njenamakachu prawy srědk přećiwo ćišćej hosći w srjedźnym polu. 0:3 třěli Martin Kies­lich (9.), přiwšěm domjacy dale wojowachu. Mustwo so zhraba a swoju ofensiwu skónčnje tež zasadźowaše, a to wosebje na lěwym křidle přez Leopolda Hölzela. W 25. min. posłuži Gabriel Čornak z dołhej třělwu Handrija Korjeńka, kiž na 1:3 skrótši. Njetraješe dołho, da steješe po wrotach Williama Plaettnera jenož hišće 2:3 (26.). Tola wot zakopa trjebachu hosćo jeno štyri přihrawki a Kieslich znowa trjechi (27.). Eficienca składnosćow běše tón dźeń njewšědnje wulka. Po začuću přihladowacych kóždy bul na wrota hač k tutej scenje tež k wrotam wjedźeše.

2:5 padny sydom mjeńšin po znowazahwizdanju. Njebjelčanscy koparjo pak so dale prócowachu a přez Plaettnera (56.,90.) a Jurja Hašku (61.) na 5:5 wurunachu. Wyskanje po wrotach Plaettnera pak njeměješe dołho wobstać. W přidatnym hrajnym času smokny Schöps wólny kop k 5:6 (90.+3) do syće hosćićela. Tak zhubichu Njebjelčenjo w poslednjej mjeńšinje remis, kotryž běchu sej z dobrej moralku ćežko nadźěłali. Přihladowarjo pak běchu horcy bój widźeli a hišće dołho sceny hry wuhódnoćichu. SJ Njebjelčicy tči tučasnje w pincy tabulki. Pozicija to, kotraž narokam mustwa docyła njewotpowěduje. Jurij Haška

wozjewjene w: Sport
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND