Kapitan Stani Šewc zastatk wurunał

wutora, 01. oktobera 2019
artikl hódnoćić
(0 )

Sokoł Ralbicy/Hórki

– ST Horni kraj/Sprjewja 2:2 (1:2)

Zestawa domjacych: Schöne – M. Matka (86. Materna), Gloxyn, Šewc, Wałda, Korjeńk (45. G. Kurjat), Bjeńš, Rawš, Domaška, Šiman (79. K. Matka), Schultz

Na Sokołow čakaše minjenu njedźelu načolna hra. Druhi wokrjesneje wyšeje ligi­ hraješe přećiwo štwórtemu. Hosćo z Hornjeho kraja běchu před lětom hišće klasu wyše nastupili a dobrowólnje klasu zestupili. Tak čakaše nazhonity a sylny kontrahent na Ralbičanow. Trenar So­kołow Chrystof Gloxyn žadaše sej połne zasadźenje a koncentraciju, wšako wočakowachu sylnu ofensiwu.

Hra běše wot spočatka wurunana a hosćo ze sylnym zasadźenjom pokazachu, zo chcedźa tež dobyć. Prěnju dobru składnosć měješe Denny Gloxyn po wól­nym kopje z 20 metrow, kotryž wrotar znješkódni. We 18. min. wotpopadny Fabian Korjeńk bul, njezamó pak prawje wotzamknyć. Hosćo startowachu hnydom konter, a nadběhowar samlutki na wrota Willija Schöne běžeše. Wón jeho zwonka šěsnatki powali a dósta za to žołtu kartu. Naslědny wólny kop přetwori Jakub Šorsák k nawjedowanju. Po poł hodźi­nje wobsuny so Schöne při wotkopje. Nadběhowar hrajny nastroj wotpopadny a hraješe prěki na Ronny Jenera, kotryž na 0:2 zwyši. Z dwojich šansow hosćo hnydom dwoje wrota docpěchu. Sokoljo so na hrajnišću motiwowachu a w 31. min. skrótšichu. Wólny kop bu wysoko do šěsnatki hraty, hdźež Bosćij Bjeńš bul z hłowu podlěši a Stani Šewc z hłowu kulowatu kožu do saka stłóči. Do połčasa by so bjezmała wurunanje poradźiło. Diagonalna třělwa docpě Pětra Domašku, kiž pak na won spěchacym wrotarju zwrěšći. Prjedy hač sudnik k połčasej wothwizda zrani so Fabian Korjeńk na kolenje a dyrbješe so wuměnić.

Ralbičenjo chcychu wězo zastatk nachwatać a stopnjowachu so w běhu druheho połčasa. Traješe pak hač do 67. min., prjedy hač so próca wudani. Wólny kop Domaška mudrje z hłowu na kapitana Šewca wotpołoži, kiž docpě druhe wrota dnja. Partija běše dale bojowniska a wotmě so skerje mjez šěsnatkomaj. Na kón­cu so žadyn kontrahent wjace do sce­ny sadźić njezamó, zo by dalše­ wrota docpěł. Sokoljo pokazachu sylnu moralku a su sej dypk zasłužili. W ta­bulce pak zhubichu městno a steja nětko na třećim. Maik Brězan

wozjewjene w: Sport
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND