Prěnja testowa hra po dołhim času chětro wužadaca była

wutora, 04. awgusta 2020
artikl hódnoćić
(0 )
Handrij Korjeńk (naprawo, Njebjelčicy) ma tež w nowej hrajnej dobje wažny garant w nadběhu prěnjeho koparskeho mustwa SJ Njebjelčicy być.  Foto: Jörg Stephan Handrij Korjeńk (naprawo, Njebjelčicy) ma tež w nowej hrajnej dobje wažny garant w nadběhu prěnjeho koparskeho mustwa SJ Njebjelčicy być. Foto: Jörg Stephan

SG Großnaundorf

– SJ Njebjelčicy 6:2 (3:0)

Zestawa hosći: Hahn – Matješk, Kral, Hanuza, Hoelzel, Haška, Korjeńk, F. Ričel, Reinelt, Fl. Domš, O. Domš, Čornak, Reineke, Lejnart, Plaettner

Po tym zo běchu koparjo Njebjel­čanskeje SJ zaso tydźensce pod dowo­lenymi wuměnjenjemi zwučowali, je so trenar Handrij Krawčik na testowu hru nje­dźelu dopołdnja ze spřećelenej SG Großnaundorf dojednał. Dokelž tamniše hrajnišćo tuchwilu ponowjeja, zetkachu so na tohorunja rjanym lěsnym traw­niku w Lomnitzu. Jedyn aktiwny hrajer je prěnje mustwo sportoweje jednotki wopušćił. Franz Gödig je so nětko po lětomaj w Njebjelčicach z powołanskich přičin zaso Njeswačidłu přizamknył. Dokelž pak pobrachowaše Njebjelčanske­mu trena­rjej tónraz z wjacorych přičin pjeć aktiwnych (Pawlik, Wagner, Šołta, Ma­laškin, Hrjehor), zapřija wón młodeho nadběhowarja Marwina Reineku. Wón bě so na treningowych jednotkach derje prezentował.

Test žadaše sej wot Njebjelčanow połnu­ koncentraciju a spěšne reakcije, dokelž bě domjacy cyłk hižo w dobrej formje a změje za dwaj tydźenjej swoju prěnju winowatostnu hru w pokalnym kole. A tak padny hižo w 11. min. 1:0, přez prawu stronu derje wuhrate a z di­rektnej třělwu w šěsnatce wotzam­knje­ne. Prěni akcent hosći sadźi Gabriel Čornak­ z wótrym wólnym kopom w 15. min., ale Großnaundorfski wrotar bě na městnje a bul wotpjasćowa. Po róžku wotzamkny Florian Ričel z niskej třělwu, wrota pak misny (20.). Lěpje­ poradźi so to­ přećiwnikej. Wótrje sa­dźe­ny róžk zhłójčkowa nadběhowar k 2:0 mócnje do sa­ka (40.). Krótko do pře­stawki ležeše kulowata koža k 3:0 w Nica Hahnowych wrotach. Přihrawku z praweje strony bě swo­bodnje stejacy hrajer direktnje přetworił.

W druhim połčasu wotzamkny Robert Lejnart po rjanej přihrawce z lěweje strony, ale kop bě přesłaby (52.). Po tym knježeše dwójce strašnosć před do­mjacymi wrotami, tola po wólnymaj kopo­maj njezamó žadyn Njebjelčan bul w saku zaměst­nić. W 70. min. wotwo­bara Józef­ Matješk, nětko w klětce stejo, strašny­ nadběh z prima zasadźenjom. Na tamnej stronje pak suny Handrij Korjeńk bul snadnje nimo wrotow. Skónčnje poradźi so młodemu Reinece na 3:1 skrótšić. Ale jenož­ pjeć mjeńšin pozdźišo třělichu domjacy 4:1 (85.). Z přichodnym nadběhom wuskoči róžk za hosći. Z lě­weje strony sadźi­ jón Korjeńk wótrje před wrota, a Rony Hanuza zhłójčkowa hrajny nastroj k 4:2 do wrotow. Nje­bjel­čenjo pak su swoje mocy nimale pře­trjebali, a tak tež koncentracija popušći. Z teje přičiny wuhrachu sej hosćićeljo we 88. min. 5:2 a hnydom po tym po wólnym kopje tež hišće 6:2.

Sobotu, 8. awgusta, wočakuje SJ Njebjelčicy koparjow Lok Slepoho. Bjarnat Deleńk

wozjewjene w: Sport
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND