Napinace treningowe lěhwo wuspěšnje skónčili

wutora, 04. awgusta 2020
artikl hódnoćić
(0 )
Dawid Matik (naprawo, Pančicy), wrotar prěnjeho koparskeho mustwa ST Marijineje hwězdy, je swoje wrota w prěnjej testowej hrě z jara dobrym wukonom čiste dźeržał. Foto: Tobias Nowak Dawid Matik (naprawo, Pančicy), wrotar prěnjeho koparskeho mustwa ST Marijineje hwězdy, je swoje wrota w prěnjej testowej hrě z jara dobrym wukonom čiste dźeržał. Foto: Tobias Nowak

ST Marijina hwězda

– ST Ćisk 2:0 (1:0)

Zestawa domjacych: O. Schmidt, Matik – Wróbl, Zelnak, R. Hawš, R. Cyž, Pesch­mann, Pjetaš, Ch. Cyž, P. Schmidt, Pakoßnick, Jurš, Eldor, Pa. Lugge, Lipič, Pi. Lugge, Langer, Čornak

Při horcym a tužnym wjedrje su koparjo noweho šeftrenarja ST Marijineje hwězdy Boda Pjetaša na domjacym arealu swoje lětuše lěćne treningowe lěhwo přewjedli. Na kóncu třidnjowskeho programa přeprosychu sej za njedźelu zastupjerja krajneje klasy ST Ćisk na přećelsku partiju. Klasowy rozdźěl přez cyłe 90 mjeńšin njebě spó­znajomny. Nawopak, prěnju wulku składnosć mějachu hosćićeljo, jako hraješe Ronald Cyž wurjadny pas ze swój­skeje połojcy Jakubej Pakoßnickej do haski. Tón smaleše samlutki na wrotarja, ale na nim zwrěšći (5.). Pančičenjo běchu taktisce jara disciplinowani. Tak njemóžachu sej hosćo ani jednu šansu w prěnim połčasu nadźěłać. W 27. min. wuhraštaj Christoph Cyž a Pakoßnick jich defensiwu z jednorym dwójnym pasom na prawym boku. Cyž widźeše w šěs­natce swobodnje stejaceho Da­wida Jurša, kiž pak z dźesać metrow bul porjadnje nje­trjechi. Jeno sydom mjeńšin pozdźišo skónčnje 1:0 padny. Z woprawdźe hoberskim energijowym wukonom přesadźi so Paul Schmidt na lěwym kři­dle a srjedź­neho nadběhowarja klóšter­skeho cyłka perfektnje posłuži. Pakoßnick cyle wěsće přetwori. Poslednju móžnosć w prěnim połčasu wuwostaji krótko po nawjedowanju Schmidt. Wón so po dobrej přihrawce Jurša sam na wrota měrje­še. Muž mjez žerdźomaj pak třělwu ze spěšnym refleksom znješkódni.

W přestawce na woběmaj bokomaj hnydom wjacorych hrajerjow wuměnichu. Ćišćenjo agěrowachu nětko z połnej paru a z wjetšim ćišćom. W 47. min. přewinychu woni hewak wěsty stejacy škit Pančičanow, Dawid Matik pak z wusa­howacej paradu třělwu z pjeć metrow wotwobara. Tež kop z distancy wón wotwobara (56.). Zbožo mějachu domjacy w 61. min. Po róžku bě nowopřichad z Małeho Wosyka Pierre Lugge kusk překwapjeny a zhłójčkowa kulowatu kožu na žerdź. Krótko po tym zhubichu hosćo w srjedźnym polu bul, a Tomaš Čornak jón hnydom Christophej Cyžej dale da. Tón pak z dwanaće metrow snadnje nimo­ třěli (63.). Tři mjeńšiny pozdźišo spózna Fabian Langer wulku dźěru w Ćišćanskej defensiwje. Po tym móžeše bjez ćežow samlutki na wrotarja běžeć, ale na nim zwrěšći. Po wólnym kopje přećiw­nika měješe po mjerwjeńcy w šěsnatce nadobo nadběhowar hosći ze šěsć metrow wulku składnosć wurunać. Znowa pak běše Matik z wuběrnej paradu z nohu dobyćer dwuboja (69.). Po standardźe w 77. min. bě partija rozsudźena. Róžk Pierra Luggi zhłójčkowa Cyž z wulkej zasa­dźitosću do syće. Dalši nowopřichad w rjadach ST Marijineje hwězdy Patrick Lugge­ měješe dźewjeć mjeńšin do wothwizdanja poslednju móžnosć. Po dwójnym pasu mjez Alijom Eldorom a Čornakom a rjanej přihrawce wón bul z dźesać metrow na wrota třěli, kop pak dźěše snadnje wyše łaty.

Facit: Nadawki, kotrež bě Bodo Pjetaš swojim chowancam do hry stajił, wosebje taktiku a hrajersku disciplinu na kopanišću nastupajo, su woni derje spjel­nili. Tak su testowu partiju tež zasłužbnje dobyli. Tobias Nowak

wozjewjene w: Sport
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND