Poprawom chcyše sej prěnje koparske mustwo Natwara Němske Pazlicy pućowanski pokal po 15. bulowej nocy na přeco zdźeržeć, štož pak so jemu bohužel njeporadźi. Přihladowarjo dožiwichu w Kamjenskej sportowni při lětanišću wobhladanjahódnu kopańcu. Tež wyšeho měšćanostu Kamjenca Rolanda Dantza móžachu zamołwići Natwara Němske Pazlicy witać a so jemu kaž tež sponsoram za wjelelětnu podpěru dźakować.
Tradiciski turněr z dźesać mustwami měješe lětsa z Bartskim ST 90 a ze Zeleno-běłymi Hórki nowačkow. Wobaj cyłkaj so bjez ćežow do turněra zarjadowaštej a pokazaštej, zo njejstej jenož k wjeselu do Kamjenca přijěłoj. Wosebje Bartscy koparjo přećiwnikow porjadnje wužadachu. Ze solidnym wukonom přesadźichu so hač do finala. Tam čakaše na nich sylne zastupnistwo Sportoweje jednotki Njebjelčicy z wusahowacym Frankom Ričelom. 24. partija turněra, kotraž bě zdobom kónčna, bě hač do poslednjeje sekundy napjata. Po bjezwrotowych dźesać mjeńšinach dyrbjachu wokoło połnocy kopy ze zdalenosće dźewjeć metrow rozsudźić. Mužojo z Njebjelčic mějachu tu wjetše zbožo.
