BSG Chemija Lipsk – FC Energija Choćebuz 0:2 (0:0)
Zestawa hosći: Spahić – Starcew, Matuwila, Stein, Schlüter, Gehrmann, Baude (42. Karbstein), Weidlich, de Freitas, Viteritti (89. Scheidhauer), Boakye (46. Mamba)
Prěnju dypkowu hru w nowym lěće je FC Energija Choćebuz w Lipsku 2:0 dobyła. K zadwělowanju bě prěni połčas, w kotrymž njeměještej wobaj cyłkaj ani jednu porjadnu akciju, kotraž móhła k wrotam wjesć. Dóšło pak je bohužel k njerjanej akciji w 39. min. Po tym zo bu Kevin Weidlich hrubje foulowany, so José Matuwila za swojeho teamoweho kolegu z dalšim foulom rewanšowaše. Matuwila dósta čerwjenu kartu, a FCE dyrbješe z mužom mjenje hrać.
Po změnje stron pak běchu Choćebuženjo lěpši a pokazachu rjane kombinacije. Tak nasta w 59. min. za Lasse Schlütera na njezwučenej prawej stronje njewšědna situacija. 20 metrow před wrotami měrješe so wón z lěwej nohu na dołhi kut. A bul přizemi při nutřkownej žerdźi wrotow k 1:0. Po 78 mjeńšinach dósta samsny kopar wot zaměnjeneho Strelija Mamby na lěwej wonkownej stronje přihrawku. Tu pokaza Schlüter znowa swoje stare kwality nadběhowarja a postara so wo kónčne 2:0.