Stani Nawka z Hamburga podawa swoje mysle w zwisku z wusyłanjom MDR „Wuhladko“ wo serbskim šulstwje:

Serbske šulstwo je dźeń a wjetši problem – nic jenož za potrjechenych šulerjow. Tu a tam so něchtó hiba, tamni zaso přihladuja, ći smjerćmudri poradźuja a na kóncu so ničo njezměni. Jako Serbski sejm smy hižo před lětami diskusiju nastorčili, smy pytali zwjazkarjow a smy dźesaćstronski program za přichod předpołožili. Hdyž pak je rezonanca snadna – potom je wša próca podarmo.

Nětko je nuza ćim wjetša a skónčnje so počina něšto hibać, skerje pomału a skedźbnje – ale widźomnje. Serbske wusyłanje „Wuhladko“ je so zašłu sobotu mjez druhim tutej temje wěnowało – a tež sejmikarjo smědźachu so wuprajić. Rěčał wšak sym wjele – w přinošku zwostał je jenož krótki zarys našeho sejmikarskeho měnjenja k palacemu problemej našeho luda. Je pjeć do dwanaćich! Jeli njenamakamy konsens wšěch stronow, budźa druzy nad nami dale rozsudźeć a njezmějemy z toho na kóncu woprawdźity wužitk.