Z wjace hač 3 000 zahrodkowymi palčikami ma drje Sven Berrar w posaarskim Völklingenje dotal jednu z najwjetšich zběrkow tajkich mužikow w Němskej. Po wšěm domje so palčiki z minjenych 125 lět hižo kopja, kaž nowinarjo rozprawjeja. Mjeztym 30lětny chutnje wo tym rozmysluje, přitwarić. Do zahrodki stajić wón małe postawy přiwšěm nochce, dokelž bychu tam kóždemužkuli wjedru wustajene byli.
Paducha-rentnarja z hoberskej lisćinu předchłostanjow je policija w Düsseldorfje zajała. Do toho bě senior z balkona bydlenja skočił a so při tym ćežko zranił. Swoje 70. narodniny minjeny kónc tydźenja dyrbješe tuž ze stražnikami w chorowni jastwa swjećić. Prěnje zasudźenje notoriskeho paducha pochadźa z lěta 1973. Jeničce w Düsseldorfje běchu jeho šěsć króć zasudźili.
Chcedźa załožbu rozšěrić
Choćebuz (dpa/SN/ch). Krajna załožba za Choćebuskej wuměłstwowy muzej Dieselowa milinarnja a statne dźiwadło móhła so wo w Frankfurće nad Wódru zaměstnjeny statny orchester kaž tež wo tamniši Muzej młodeho wuměłstwa rozšěrić. Kulturna ministerka Sabine Kunst (SPD) da to tuchwilu pruwować. „Rozšěrjena załožba móhła krajne nadawki dołhodobnje lěpje spjelnjeć a wuměłske profile mjenowanych kulturnych zarjadnišćow zawěsćić“, praji politikarka SPD nowinje Märkische Oderzeitung. Muzej młodeho wuměłstwa by ze swojej wuměłskej zběrku NDR planowany Muzej moderneho wuměłstwa wobohaćił, kotryž měł so z aktualnym wuchodoněmskim a wuchodoeuropskim wuměłstwom rozšěrić.
Wopomnišćo přepodali
Choćebuz (HA/SN). W Braniborskej hižo dlěje wo noworjadowanju wokrjesow diskutuja, štož na kóncu rěka, zo ma jich přichodnje mjenje być. We wobłuku reformy je předwidźane, zo zhubja města Choćebuz, Brandenburg a Frankfurt nad Wódru swój dotalny status „bjezwokrjesneho města“. Jeničce braniborska stolica Podstupim ma dale prawo měć, zo njeje ze žanym wokrjesom kruće zwjazana.
Potrjechene tři města pak so planam krajneho knježerstwa wobaraja. Čłonojo Choćebuskeje měšćanskeje rady su tuž na minjenym posedźenju wo tym wuradźowali. W tym zwisku schwalichu deklaraciju, z kotrejž žadaja sej za wulku łužisku metropolu Choćebuz dalši bjezwokrjesny status a tak politisku samostatnosć. Radźićeljo skedźbnjeja na to, zo je město na politiskim, hospodarskim a kulturnym žiwjenju mjeztym připóznate srjedźišćo Delnjeje Łužicy. Tónle nadawk móže najlěpje dale wupjelnjeć, wostanje-li bjezwokrjesne.
Wot Němskeho zwjazka dźěłarnistwow (DGB) organizowane lětuše mejske swjedźenje stejachu tež we Łužicy w znamjenju jubileja. Před 125 lětami swjećachu 1. meju prěni raz po wšěm swěće jako „dźeń protesta a wopominanja“.
Budyšin/Wojerecy (SN/at/JK). Pod hesłom „Dźěło přichoda wuhotujemy my“ měješe wobwodny nawoda IG metal Berlin-Braniborska-Sakska Olivier Höbel narěč na mejskim swjedźenju DGB w Budyšinje. Rěčnik zakitowaše zawjedźenu minimalnu mzdu w Němskej a je kritiku dźěłodawarjow na njej njesměrneje běrokratije dla jako „dospołny njezmysł“ wotpokazał. Dale přiwobroći so Höbel renće ze 67 lětami. „Renta dyrbi dosahać, zo móžeš žiwy być, hewak hrozy chudoba w starobje.“ Tomu zadźěwać je nadawk socialnozawěsćenskeje renty a stata. Jako njeakceptabelny přećiwk k tomu mjenowaše dźěłarnik minjenu srjedu wobzamknjenu rentu za zapósłancow Sakskeho krajneho sejma z 63 lětami resp. po 15lětnym skutkowanju.
Budyšin (SN/JaW). Rada Załožby za serbski lud chce móžne přeměstnjenje Budyskeje Serbskeje kulturneje informacije (SKI) ze Serbskeho domu do Röhrscheidtoweje bašty na terenje Serbskeho ludoweho ansambla pruwować. Tole rjekny předsyda załožboweje rady Jan Budar žurnalistam po posedźenju gremija w sprjewinym měsće.
Jan Budar skedźbni wuraznje na to, zo „je přeměstnjenje SKI dotal jenož namjet“. K naležnosći chce załožbowa rada najprjedy koncept zhotowić dać, kotryž ma jako zakład za rozsud wo přećahu SKI słužić. W koncepće ma so mjez druhim wobjednać, „kak móhli přeměstnjenje zwoprawdźić a što stanje so z dotal wužiwanymi rumnosćemi w Serbskim domje“, Budar rozłoži, „je to ryzy zdźěłanje móžnosćow, kotrež maja rozsud w naležnosći wolóžić. Zdobom smy do nadawka zapřijeli pasus, zo ma so konkretny nadawk za zdźěłanje koncepta, prjedy hač so přepoda, hišće raz ze serbskimi zastupjerjemi załožboweje rady wothłosować.“ Wo tym, hač SKI do Röhrscheidtoweje bašty přećehnje, chce rada załožby najzašo w nowembru rozsudźić.
Podstupim (SN/at). „Najlěpši přikład za to, zo regionalna identita tež kulturnu identitu kraja twori, je serbska kultura“, rjekny přisłušna ministerka Sabine Kunst (SPD) we wobłuku aktualneje hodźiny ke kulturnej identiće w Kraju Braniborskej minjenu srjedu w Podstupimskim krajnym sejmje. „Cyły teritorij dźensnišeho Kraja Braniborskeje ma słowjanske korjenje. Hač donětka je serbsko-němska zhromadnosć potajkim tworjacy aspekt braniborskeje identity. Tele kulturne wzajomne skutkowanja bóle wuwědomić, serbsku identitu skrućić kaž tež bikulturny charakter Łužicy zachować su za krajne knježerstwo naležnosć wutroby a zawjazk naraz.“