Z dypkom a poražku sezonu zahajili

póndźela, 26. awgusta 2019
artikl hódnoćić
(0 )
Lucian Zahrodnik, hrajer prěnjeho kopar skeho mustwa Chróšćanskeje SJ w akciji, jako hraješe VfB Běła Woda w Hornjej Łužicy  Foto: Jörg Stephan Lucian Zahrodnik, hrajer prěnjeho kopar skeho mustwa Chróšćanskeje SJ w akciji, jako hraješe VfB Běła Woda w Hornjej Łužicy Foto: Jörg Stephan

Tabulka krajneje klasy

1. TSV Rotacija Drježdźany 2 7 :2  6

2. SZ Drježdźany-Strěžin 2 6 :1  6

3. Drježdźanski SC 1898 2 3 :1  4

4. ST Trjebin 2 3 :2  4

5. VfB Běła Woda 1909 2 4 :3  3

6. Drježdźany-Laubegast 2 5 :5  3

7. SG Weixdorf 2 4 :5  3

8. ST Ćisk 2 3 :3  2

9. FSV Oderwitz 02 1 2 :2  1

10. SC Großröhrsdorf 2 2 :3  1

11. SJ Chrósćicy 2 1 :3  1

12. Rakečanske ST 2 2 :5  1

13. FC Wocl Rěčicy 2 1 :4  0

14. SC Borea Drježdźany 1 1 :5  0


SJ Chrósćicy

– SC 1911 Großröhrsdorf 1:1 (0:0)

Zestawa domjacych: Králíček – F. Cyž (84. Matješk), B. Cyž, Sentivan, Püschel, M. Zahrodnik, Runt, Špitank (56. Žur), G. Zahrodnik (77. Zynda), Henzl, Bogusz

Po poražce w pokalu chcychu koparjo Chróšćanskeje SJ do sezony w krajnej klasy­ lěpje startować. Z hosćom z Großröhrsdorfa wočakowachu woni mustwo, kotrež ma wosebje dobru defensiwu a podobny hrajny stil kaž Chróšćenjo. To so tež na hrajnišću pokaza. Woni drje spy­tachu sej zas a zaso móžnosće wuhrać, hosćo pak wěsće stejachu. Nimo toho­ sadźachu někotre dobre kontery. W centrumje ski­ćachu so jim přewulke rumy, kotrež tež wužiwachu. Po njewěstej spočatnej fazy so domjacy stabilizowachu, falo­wachu pak přeco hišće poslednja konsekwenca a zdźěla tež ideje. Nowopřichad Pavel Bína móhł so wo tajke postarać, ale wón sedźeše zranjenja dla jenož jako přihladowar na ławce.

W druhim połčasu Chróšćenjo přez zaměnjeneho Simona Žura w ofensiwje wariabelnišo wustupowachu a sej někotre móžnosće wuhrachu. Runje w fazy lochkeje dominancy padny nawjedo­wanje za hosći, a to přez konter, kotryž woni z krutej wolu hač do kónca wu­hra­chu. Byrnjež třělwa słaba była, wjedźeše placěrowany bul k 0:1. Hra z mało móžnosćemi na woběmaj stronomaj zdaše so w 77. min. rozsudźena być. Krótko do kón­ca pak sadźichu Chróšćenjo tak mjenowany „lucky punch“ a tola hišće wu­runachu. Po flance Filipa Henzla wupadaše za tym, zo njesteji nichtó z domjacych w šěsnatce. Wotzady přismali Žur a smokny bul z połnym rizikom na wro­ta. K wjeselu hrajerjow SJC a jich přiwiskej dźěše kop k 1:1 do praweho kuta­. Kajke krasne to wrota! Něko­tre mjeńšiny pozdźišo sudnik hru wothwizda. Feliks Cyž

VfB Běła Woda – SJ Chrósćicy 2:0 (1:0)

Zestawa hosći: Králíček – Püschel, B. Cyž, Sentivan, F. Cyž, M. Zahrodnik, G. Zahrodnik, Henzl, Runt (68. Zynda), L. Zahrodnik (53. Žur), Bogusz (53. Špitank)

Na druhim hrajnym dnju w krajnej ko­parskej klasy podachu so Chróšćenjo do Běłeje Wody. Wšitkim bě jasne, zo budźe­ to wurunana hra, wšako bě loni na samsnym městnje ke kurioznemu 4:4 dóšło. Wot wšeho spočatka su domjacy wulki ćišć na Chróšćanske wrota wukonjeli. Hižo w 2. min. so Ben Weiser pře­sadźi a suny bul z krótkeje distancy k 1:0 do wrotow. Žadyn to optimalny start za ho­sći. Domjacy sej na to hišće dalše šansy wuhrachu, stajnje pak falowaše dokład­nosć při zakónčenju. Prěnju móžnosć za Chróšćansku SJ měješe Filip Henzl. Po flance z praweje strony dósta wón na kromje šěsnatki bul, ale jeho třěl­wa­ wrota misny. Tak wuwi so nětko hra mjez šěsnatkomaj z małymi šan­sami, mnohimi foulemi a diskusijemi. W 30. min. běžeše Weiser samlutki na wrota Petra Králíčeka. Tón pak zamó z dwěmaj wuběrnymaj refleksomaj dalšim wrotam zadźěwać. Na tamnej stronje přesadźi so Maksimilian Zahrodnik na lěwej stronje a flankowaše na Jana Bogusza, kiž pak njebě wuspěšny (35.). Krótko po tym sudnik k połčasej wothwizda.

Krótko po znowazahwizdanju trjechi Běła Woda 2:0 (50.). Po flance z lěweje strony zhłójčkowa kapitan Axel Buder bul do wrotow. Chróšćenjo drje ćišć powjetšichu, ale k prawym šansam njedóńdźechu. Defensiwa domjacych běše derje organizowana, a hosćom falowaše prawa ideja před šěsnatku. W 66. min. dósta Bosćij Cyž žołto-čerwjenu kartu, štož so wězo na hru hosći negatiwnje wuskut­kowaše. Chróšćenjo so njepodachu a dale wojowachu, wosta pak při poražce.

Nětko rěka so derje na přichodny duel přihotować. Přichodnu njedźelu přijědźe do Chrósćic Rotacija Drježdźany. To chce SJ Chrósćicy na kóždy pad zaso dypkować. Maksimilian Zahrodnik

wozjewjene w: Sport
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND