Domjacy słabje wustupowali

wutora, 27. awgusta 2019
artikl hódnoćić
(0 )
Wšitke prócowanja srjedźopólneho hrajerja Sokoła Ralbicy/Hórki Dennyja Gloxyna (při bulu) wostachu přećiwo Kulowčanam bjez wuspěcha. Foto: Werner Müller Wšitke prócowanja srjedźopólneho hrajerja Sokoła Ralbicy/Hórki Dennyja Gloxyna (při bulu) wostachu přećiwo Kulowčanam bjez wuspěcha. Foto: Werner Müller

Sokoł Ralbicy/Hórki

– Módro-běli Kulow 1:2 (0:0)

Zestawa domjacych: Schöne – M. Matka, K. Matka, Gloxyn, Šewc, Wałda, G. Kurjat (46. Korjeńk), Bjeńš, Rawš, M. Kurjat (46. Domaška), Šiman (72. Janca)

Zestawa hosći: Horn – Sauer, Hantschke (60. Zablocki), Korch, Koplanski (77. Piatza), Bulang, Wehlan (67. Graf), Kockert, Kubaink, Bergmann, Maywald

Třeću dypkowu hru hišće młodeje sezony přewjedźechu koparjo Sokoła Ral­bicy/Hórki doma přećiwo Módro-běłym z bliskeho Kulowa. Hižo na poslednim hrajnym dnju minjeneje sezony běchu přihladowarjo na samsnym městnje woprawdźity spektakl dožiwili. Cyłkownje widźachu woni tehdom pjeć wrotow a čerwjenu kartu za Sokołow. Kulowčenjo na kóncu z 3:2 dobychu. Chowancy trenarja Chrystofa Gloxyna chcychu to nětko lěpje sčinić,­ štož pak so jim dospołnje nimokuli. W prěnim połčasu hrajachu mjenujcy jenož­ hosćo a pokazachu prawe nastajenje. W 10. min. nadźěłachu sej přez spěšneho Paula Kockerta prěnju składnosć, kotruž wrotar Willi Schöne znješkódni. Jeničku šansu za Sokołow měješe Gabriel Kurjat mjeńšinu pozdźišo, ale jeho pospyt dźěše wyše wrotow. W 20. min. wuchowa Aleksander Wałda we wulkej nuzy, a w 35. min. znowa Schöne zastatkej zadźěwa. Domjacy móžachu so wrotarjej dźakować, zo njesteješe hižo k połčasej 0:2.

Po přestawce pósła trenar Gloxyn Fabia­na Korjeńka a Pětra Domašku na kopanišćo. To so tež hnydom wudani. Mi­chał Matka wuwojowa sej w 50. min. bul na prawej stronje a posłuži Domašku, kiž njeda so prosyć a třěli 1:0. Dal­šu składnosć njezamó Denny Gloxyn wužić. Štóž sej mysleše, zo hosćićel trěbnu wěstosć namaka, bu přesłapjeny. Ćišć Kulow­čanow přiběraše. W 71. min. bu bul rjenje do haski tyknjeny a Paul Ko­ckert­ wuruna. Kuriozne běchu dobyćerske wro­ta Kulowskich. Spěšny Kockert bu pósła­ny a běše najskerje zašo při bulu hač Ralbičanski wrotar. Schöne pak dósta sej mócnje na hłowu a wosta ležo. Bul w tym woko­miku Bosćijej Bjeńšej na hłowu zleća­ a wottam k 1:2 do wrotow (89.). Domjacy ličachu z foulom, sudnik pak rozsudźi na wrota. Schöne njemóžeše hižo­ dale dźeržeć, a z mužom mjenje so Sokołam tež ničo wjace njeporadźi. Tak rěkaše dobyćer derbyja Kulow.

Facit: Cyłu hru běchu hosćo lěpše a agil­niše. Ralbičenjo přesłapichu wosebje w 1. połčasu a sebi tak dypki njezasłužichu. Za tydźeń w Kumwałdźe maja šansu, so zaso zhrabać. Maik Brězan

wozjewjene w: Sport
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND