Wonka dalše dypki žnjeli

srjeda, 28. awgusta 2019
artikl hódnoćić
(0 )

ST Nadrózna Hrabowka

– ST 1922 Radwor 1:3 (1:2)

Zestawa hosći: Grenzemann – Bauer, Šěrak, Wjeńka, Jendrewski, Robel (61. Paška), Wjacławk, Zähr, Pječak (46. Rachela), Schulze, Hettasch

Na třećim hrajnym dnju wokrjesneje ligi, stafle 2 dojědźechu sej Radworscy koparjo do Nadrózneje Hrabowki. Tam njemóžachu połny potencial kadra wu­žiwać, dokelž běchu někotři hrajerjo zranje­nja abo někajkich terminow dla zadźě­wani. Trenar Andi Schulz měješe dobre začuće a chcyše so přiwšěm z třomi dypkami do Radworja wróćić. Tak zapo­čachu hosćo jara angažowani a wuhrachu sej tež dobre móžnosće. Hižo w prěnjej mjeńšinje móhł kapitan Tom Schulze k nawjedowanju trjechić, je pak wrota z centralneje pozicije snadnje misnył. Dalše dobre móžnosće wuhrachu stajnje přez lěwu stronu, hdźež Matej Wjeńka a Johannes Wjacławk mjeztym derje harmonujetaj. Po pitnej přestawce w 25. min. bě to potom tež Wjacławk, kiž so wo zasłužene 0:1 postara. Wólny kop z ně­hdźe 20 metrow sadźi wón do dołheho kuta. Tež po nawjedowanju wostachu Ra­dworčenjo dale dominantne mustwo. W 37. min. poradźichu so Schulzemu druhe wrota, jako bul z něhdźe sydom metrow z dobrej třělwu pod łatu kopny. Hakle nětko domjacy wotućichu a přińdźechu tohorunja k dobrym móžnosćam. Tak na přikład w 40. min. jako nadběhowar jenož hišće Radworskeho wrotarja Pětra Grenzemanna před sobu měješe, ale bul jasnje pódla wrotow třěli. Krótko do přestawki woni tajku móžnosć wužichu a k 1:2 (44.) přetworichu.

Po přestawce wosebje napadny, zo domjacy dwuboje bóle přiwzachu a sej zdźěla z foulemi dale pomhachu. Dokelž pak mějachu Radworčenjo jenož dweju koparjow na ławce, njemóžachu wot 61. min. hižo nikoho wuměnić. Tak dyrbještaj potom tež Karl Hettasch a Michał Bauer dale na trawniku wutrać, hačrunjež měještaj po wšelakich dwubojach lochke ćeže zaso na noze přińć. W 69. min. hosćo nawjedowanje samo wutwarichu. Po wysokej třělwje přez přećiwniski škit třěli młody Marvin Paška swoje prěnje wrota w trikoće Radworskich muži. Ći móžachu wuslědk hač do kónca hry wobchować a sej tři dypki zawěsćić.

Přichodnu njedźelu přijědu koparjo Hrajneho zjednoćenstwa Lubuš/Bluń do Ra­dworja. Daniel Nuk

wozjewjene w: Sport
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND