Běłobóski běh z rekordnym wobdźělenjom

štwórtk, 29. awgusta 2019
artikl hódnoćić
(0 )
Na jubilejnych štyrcetych běhach we Wopakej wubědźowaše so zašły kónc tydźenja tež horstka Serbow. Wotlěwa zestupachu so k skupinskemu wobrazej Janek Süß z Wopakeje, Jakub Čórlich z Němcow a Jurij Nuk z Budyšina.  Foto: Monika Süßowa Na jubilejnych štyrcetych běhach we Wopakej wubědźowaše so zašły kónc tydźenja tež horstka Serbow. Wotlěwa zestupachu so k skupinskemu wobrazej Janek Süß z Wopakeje, Jakub Čórlich z Němcow a Jurij Nuk z Budyšina. Foto: Monika Süßowa

Na 40. jubilejnym Wopačanskim Běłobó­skim běhu po tamnišej hórskej krajinje je so minjenu njedźelu mjez 420 wobdźělnikami tež horstka serbskich běharjow dračowała.

Wot lěta 1979 organizuje jara agilne Wopa­čanske sportowe zjednoćenstwo w přikładnej zhromadnosći z tamnišim gmejnskim zarjadom we wšěm nastu­panju stajnje tute jara ćežke, a tola přewšo woblubowane wurisanje běharjow. A tak běše to tež na lětušim jubilejnym z předsydu zjednoćenstwa Winfriedom Haasu a z měšćanostku Sylwiju Hölzel na čole. Wjele ludźi je sportowcam zaso­ mócnje přikleskowało a jich pohonjało, a to po puću kaž tež w stadionje. Mnozy woby­dlerjo su swoje domy abo zahro­dy atd. rjenje wupyšili. Wurjadna a wutrobna to atmosfera. Lětsa je kóždy atlet­ tež hódnu praktisku dopomnjenku na 40. jubilejne wurisanje dóstał.

Jednotliwe distancy wurisanjow běchu 0,4/1,5/4,9/12 a 20 km. Běh na 0,4 km běše­ prěni króć bambinijowy za dźěći pod štyrjomi lětami, štož běše jedne koło na běžni po stadionje, a tam je 23 pjerachow startowało.

Wjacore distancy jubilejneho běha wjedźechu wšitke najprjedy bjezposrědnje po starće kaž potom tež do cila stajnje koło po běžni stadiona, start a cil wšitkich wurisanjow běštej po tradiciji stajnje na arealu Wopačanskeho sport­nišća. Po stadionowym kole wjedźechu wone bórze po sylnje stupacej dróze sy­dlišća dale po pódlanskich pućach, lěsnych, łučnych a pólnych šćežkach horje a dele po rjanej hórskej krajinje. Wosebje naročnej najdlěšej čarje 12 a 20 km wjedźetej stajnje přez wjeršk 500 metrow wysokeho Běłoboha.

Běhi hódnoćachu tež za lětušej rjadnej lisćinje Wopačanski cup běharjow a za Drježdźansku wobwodnu seriju.

Aktiwni běchu hłownje z Hornjeje a srjedź­neje Łužicy, z Drježdźan a woko­liny, z Berlina, Jeny a ze Zgorzeleca.

Sylny aplaws a wosebite připóznaće zasłužataj sej za zmištrowanje 20 km ćežke­je distancy Jakub Čórlich z Němcow w spěšnych 1:37:15 hodź, štož běše bronzowe městno na dobyćerskim po­desće, a Janek Süß z Wopakeje za 5. městno w 1:50:55 hodź. Wobaj wubědźujetaj so w starobnej klasy 20–29 lět.

Roman Měrćink z Baćonja wubědźi sej na čarje 12 km w klasy 30 slěborne podestne městno w 56:35 min, štož běše wulkotne cyłkowne 7. městno.

We wurisanju 4,9 km docpě Gernot Pakoßnick z Budyšina wosme městno (30:34 min); Jurij Nuk z Budyšina zmištrowa čaru­ w 44:28 min. – a to rěkaše druhe městno w starobnej klasy 85 plus. Wón běše zdobom druhi najstarši běhar we Wopakej. Jurij Nuk

wozjewjene w: Sport
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND