Zarjady Zhorjelskeho a Budyskeho wokrjesa wuměnjeja jězbne dowolnosće
Budyšin/Zhorjelc (SN/BŠe). Šěra, zelena abo róžojta papjerka abo tola mała plastikowa kartka – w móšnjach maja ludźo najwšelakoriše jězbne dowolnosće. Po wobzamknjenju Europskeje unije pak měli wone jednotne być, a tohodla dyrbjeli šoferojo swoje wodźerske wopisma wuměnić. Zwjazkowe knježerstwo schwali za to hižo loni schodźenkowy plan, po kotrymž maja zarjady za jězbnu dowolnosć postupować. Něhdźe 43 milionow ludźi w Němskej dyrbi přichodnje swoje papjery wuměnić. Hač do 19. januara 2033 ma schodźenkowy plan zwoprawdźeny być.
„Jězdźenje bjez płaćiweje dowolnosće je přeńdźenje přećiwo porjadej a ma so tuž chłostać“, informuje nowinska rěčnica Zhorjelskeho wokrjesa Franziska Glaubitz. Wuraznje skedźbnja wona na postajenje zwjazkoweho knježerstwa, kotrež je dokładne postupowanje wozjewiło.
