Na „misiji2038“ so wobdźělić

srjeda, 09. septembera 2020
artikl hódnoćić
(0 )

Młodostni maja často dobre ideje, móža so derje do temow zadźěłać a wo nich rozmyslować. Tohodla je Němska dźěćaca a młodźinska załožba (DKJS) projekt pod hesłom „Misija2038“ załožiła, we wo­błuku kotrejež so młodostni z přichodom Łužicy zaběraja.

Budyšin (SN/BŠe). „Misija2038 – Twój přichod we Łužicy“ je tema projekta DKJS, kotraž młodostnych hižo dlěje zabě­ra. Planowanu młodźinsku konfe­rencu w měrcu dyrbjachu iniciatorojo korony dla wotprajić. Na to so rozsudźichu digitalne konferency poskićeć, wšako z přizjewjenjow na prěnje zarjadowanje začuwachu, zo je tema jara wažna. W apry­lu a meji witachu młodostnych w starobje 14 do 24 lět. Kaž z rozmołwow wuchadźa, přeja sej woni lěpši image regio­na, a to předewšěm z pomocu turi­stiskeho wobłuka. Bjezposrědnjej mjezy k Pólskej a Čěskej stej lěpšina, z kotrejež hodźi so čerpać.

Kaž sobudźěłaćer DKJS Julian Schmidt na naprašowanje zdźěli, njejsu so na digitalnych konferencach žani serbscy młodostni wobdźělili. Přiwšěm pak su tamni wo Serbach rěčeli a maja lud, nałož­ki a jich tradicije za wosebitosć. Tež rekultiwěrowanje brunicowych jamow so pozitiwnje na region wuskutkuje, běchu sej přitomni přezjedni. Młodostnym pak pobrachuja perspektiwy. Tak njeje dosć mobilnych srědkow abo wobchadnych zwiskow. Tež atraktiwnych dźěłowych městnow je jara mało.

Cyłkownje tři digitalne konferency su do­tal wotměli, dalše kročele pak su trěbne. Dokelž załožba dźěći a młodostnych ideje młodeje generacije chutnje bjerje, přeprošuje wona 19. septembra na štyri konferency, kotrež budu we Wojerecach, Złym Komorowje, Lubiju a Zhorjelcu. Na internetnej stronje www.eveeno.com/MISSION2038-HY móža so zajimcy na přikład za zarjadowanje we Wojerowskej Kulturnej fabrice přizjewić. Dokelž­ maja wěstotne wotstawki korony dla dodźeržeć je ličba wobdźělnikow na cyłkownje 30 wobmjezowana. Zaměr zarjadowanjow ma być, zo młodostni konkretne ideje za swoju domiznu wuwija. Někotrych z nich chce DKJS fachowje pře­wodźeć abo jim z pjenjezami pomhać. Hišće lětsa chcedźa ideje młodych Łužičanow nastorčić.

Sakske socialne ministerstwo kaž tež Dźě­łarnja přichod Łužica projekt „Misija2038“ podpěrujetej.

wozjewjene w: Hospodarstwo
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND