Zapadołužiski koparski zwjazk (WFV) wuhotowa sobotu třećeho adwentneho kónca tydźenja druhe wotewrjene halowe wokrjesne mišterstwo žonow. Nimo šěsć mustwow z towarstwow WFV wobdźělichu so tři teamy z koparskeho zwjazka Hornja Łužica. Wot tuteje sezony nastupja žónske mustwa z Hornjeje Łužicy tež na dypkowych hrach wólnočasneje ligi WFV, zo by so prawidłowne cyłolětne hraće kopańcy z wjacorymi žónskimi mustwami zmóžniło.

Hosćićeljo TSV Wjernarjecy postarachu so wo najlěpše organizatoriske ramikowe wuměnjenja a sobupućowacy fanojo, wosebje z Bukec, wo trěbnu naladu w sportowej hali. Na zakładźe dźewjeć přizjewjenjow su w dwěmaj staflomaj hrali, zo bychu so po tym z překřižnymi hrami zaměstnjenske hry přewjedli. Nimo někotrehožkuli jasneho wuslědka wuwichu so tež jara krótke, napjate ­partije. To wězo wosebje w rozsudnych ­partijach, dokelž běše na kóncu wukonowy niwow wotpowědnych žónskich mustwow w partijach jara podobny.