Łužiske lodohokejowe liški –

Ravensburg Towerstars 2:1 p. tř. p.

(1:0, 0:0, 0:1 – 1:0)

27. hrajny dźeń, bě dźeń jubilejow w Běłowodźanskej lodowej arenje. 91 lět lodowy sport w Běłej Wodźe a 22 lět fanowy klub „Blue Sons“.

Prěnju składnosć na tutym wječoru mějachu hosćo. Nikita Quapp we wrotach Liškow puk suwerenje wotwobara. Amtěrowacy mišter DEL2 a tuchwilny druhi tabulki měješe optisce wjace hrajnych podźělow na spočatku prěnjeje třećiny a Liški čakachu sćerpnje na swoje móžnosće a kontery. Potom dóstachu Ravensburgscy lodohokejisća prěnje chłostanje a domjacy prezentowachu sylnu hru z hrajerjom wjac na lodźe. Woni dachu čornu tačel spěšnje přez rynki běžeć a docpěchu w třećim pospyće nawjedowanje 1:0. Ville Järveläinen přetwori wrota po předdźěle Louisa Andersa a Roope Mäkitala.