Kónc 2027 so rozsudźi, hač Einsteinowy teleskop we Łužicy natwarja
Zhorjelc, Nowoslicy. (SN/StŠ) Wjacore módre kontejnery, wobdate wot twarskich płotow – wjace při točenskej dźěrje za móžny Einsteinowy teleskop njedaloko něhdyšeho Jurasec młyna blisko Nowoslic tuchwilu widźeć njeje. A tola, tak zamołwity team Drježdźanskeje Techniskeje uniwersity zdźěli, tam aktualnje we hłubokosći něhdźe 200 metrow měrja, kak ćicho pod delanskimi honami woprawdźe je.





