Budyšin (SN/MiR). Njewočakowano wjele čłonow a dalšich zajimcow bě wčera na čłonsku zhromadźiznu tvBUNT, syće za demokratiju a mnohotnosć w Budyskim wokrjesu, do Křiweho doma w bydlenskej štwórći Strowotna studnja přichwatało. Hłownohamtskej regionalnej koordinatorce Sophie Mörbe a Lea Krause přitomnych z kwisom překwapištej, kotryž žadaše sej kreatiwnosć, wědu, zamóžnosć trochowanja, wosebje pak kmanosć, z wjesołym posměwkom na prašenja wotmołwić móc. Tak chcyše Aileen Böhm wot ewangelsko-lutherskeje wosady Budyšin, kotraž bě kwis zhromadnje ze Sophie Mörbe přihotowała, wědźeć, kelko kilometrow bě Mörbe lětsa z awtom po puću była, jako bě na wubědźowanja bičtury radija Satkula mjez druhim do Kulowa, Wotrowa a Njebjelčic jěła. To běše na wšěch 150 kilometrow. Sophie Mörbe rozprawješe, zo běchu jej serbscy młodostni w mobilnym připowěšaku tvBUNT wo swojich nazhonjenjach z diskriminaciju a wumjezowanjom powědali. Dale jej rjeknychu, zo přeja sej na přikład rjeńše sportnišćo w swojej wjesce.