ST Radwor – ST Kubšicy 4:0 (1:0)
Zestawa domjacych: Wróbl - Henke, Buša, Sćapan, Zähr, von Karwin, Šram, Bauer (64. Winar), Nuk, Schulze, Mark
Po dobytym derbyju w Małym Wjelkowje chcychu koparjo ST Radworja tabulkoweho susoda (wobaj dźewjeć dypkow) najlěpje z dobyćom na wotstawk dźeržeć. Hosćo z Kubšic běchu derje do sezony startowali. W třoch hrach zaručichu sej dźewjeć dypkow z wrotowym poměrom 8:1!
Přihladowarjo njeběchu hišće docyła na městnach, da hižo we wrotach hosći zaklinka. Schulze so po dobrej přihrawce Šrama w šěsnatce přesadźi a ze zwučenej zymnokrejnosću k 1:0 přetwori (2.). To dyrbjało domjacych poprawom změrować. Nětko pak Kubšičenjo nadběhowachu. Ze zapalom spytachu woni wurunać. Zwjetša spytachu to z distancowymi třělwami, kotrež pak Wróbl znješkódni. Hakle w 25 min. so znowa Schulze sam před hóstnymi wrotami zjewi, po tym zo běše Mark bul strašnje na wrotarja třělił. W cyłym prěnim połčasu hosćo tłóčachu, Radworčenjo pak móžachu so přeco na Wróbla w klětce spušćeć.