Moskwa (dpa/SN). Štyri dny po terorowym nadpadźe w Moskwje pomocnicy hižo dlěje za zhubjenymi w zdźěla sypnjenej koncertnej žurli njepytaja. Nawoda zarjada za škit před katastrofami Sergej Poletykin je sej wěsty, zo pod rozwalinami žane wopory wjace njeleža.
Při nadpadźe minjeny pjatk je znajmjeńša 139 ludźi žiwjenje přisadźiło. Nimale 200 wopytowarjow so zranichu, jako štyrjo wobrónjeni w koncertnej žurli Crocus Hall do ludźi třělachu. K njeskutkej je so teroristiska organizacija Islamistiski stat wuznała. Ruscy politikarjo na to tukaja, zo su terorisća w nadawku Ukrainy a zapadnych krajow jednali.
Gaza/Washington (dpa/SN). Indirektne jednanja wo přiměrje w Gazaskej wójnje su tčacy wostali. Israelsku delegaciju su po informacijach medijow z Katara wróćo zwołali. W tym zwisku sej USA a Israel znowa mjez sobu wumjetuja.
Israelski ministerski prezident Benjamin Netanjahu wčera wječor rjekny: Hamas dopokazuje, zo nima zajim na nowych jednanjach. Je to zrudna pokazka na škodu, kotruž je rozsud bjezstrašnostneje rady UNO načinił.“
Knježerstwo USA je tole hnydom wotpokazało: Wumjetowanja Israela přećiwo Hamas su „njedokładne a njefairne napřećo zastajencam a jich swójbnym“, zdźěli rěčnik wonkowneho ministerstwa Matthew Miller we Washingtonje.
Wojerecy (AK/SN). Město Wojerecy wotewrěje wutoru po jutrach wosebity labor k temje „změna strukturow“: „Labor čiń sobu!“. „Je to platforma, kotraž informuje wo wědomosći a kotraž přisporja kubłanje a schadźowanje mjez wobydlerjemi. Chcemy tu wo wjacorych projektach slědźenja do přichoda informować“, podšmórny Sebastian Schindler, sobudźěłaćer projektneje skupiny změna strukturow a koordinator labora, wutoru na posedźenju Wojerowskeje měšćanskeje rady.
Město je labor w něhdyšej korčmje „Wódny muž“ na dróze Dietricha Bonhoeffera blisko domu Martina Luthera Kinga zaměstniło. Projektny partner je Drježdźanska Techniska uniwersita, łužiski centrum technologije Lautech tzwr kaž tež Astrocentrum Łužica. W laborje předstaja zamołwići mjez druhim: Smart Mobility Lab w Čornym Chołmcu, kotryž informuje wo swojim wobchadnym projekće SIVAS (wěstota splećeneho a awtomatizowaneho wobchada), astronomiski podzemski labor „Low Seismic“ Astrocentruma Łužica w Konjecach, kaž tež přichodny Centrum za twarjenje a bydlenje we Wojerecach.
Z čestnym rjadom wuznamjenił je georgiski knježerstwowy šef Irakli Kobachidse hrajerjow narodneho koparskeho mustwa po prěnjej kwalifikaciji za europske koparske mišterstwo. „To je wulke zbožo, kotrež nas jednoći. Naši hólcy su rjekojo“, rjekny wón na Naměsće republiki w georgiskej stolicy Tiflisu, hdźež mustwo z fanami swjećeše. Do toho běchu so Georgičanjow w napjatym třělenju jědnatkow 4:2 přećiwo Grjekskej přesadźili.
Cannabis na Oktoberskim swjedźenju? Tute prašenje zamołwitych najwjetšeho ludoweho swjedźenja swěta zaběra, po tym zo su konop wot 1. apryla dźělnje legalizowali. Wobchadźenje z tutym wopojnym jědom chcedźa we wosebitym wukazu rjadować, hospodarski referat bayerskeje stolicy zdźěla. Hižo nětko strowotniske ministerstwo před tym warnuje, cannabis a alkohol měšeć.
London (dpa/SN). Załožerja wotkrywanskeje platformy Wikileaks Juliana Assangea njesmědźa bjezposrědnje justicy USA přepodać. To je najwyše britiske sudnistwo High Court dźensa w Londonje rozsudźiło. Je to wažny juristiski wuspěch Assangea a jeho přiwisnikow. Knježerstwo USA chce Awstralčana spionaže dla k 175 lětam jastwa zasudźić, dokelž je wón tajne akty wo wójnskich złóstnistwach USA w Iraku a Afghanistanje wozjewił. Assange powołuje so na žurnalistiske prawa.
Ruska pyta za zamołwitymi
Moskwa (dpa/SN). Po wočiwidnje islamistiskim terorowym nadpadźe pola Moskwy pytaja fachowcy za wěstotu w Ruskej z wotmachom za zamołwitymi. „Wěmy, zo su radikalni islamisća złóstnistwo skućili“, bě prezident Wladimir Putin wčera wječor rjekł. Nětko chce Ruska wědźeć, štó je jim nadawk za to dał. Při nadpadźe běchu štyrjo mužojo na wopytowarjow Crocus City Hall třěleli a po tym twarjenje zapalili. Ličba smjertnych woporow je mjeztym na 139 rozrostła.
Pomjezne kontrole planowane