Wučerjo-wolejbulisća Serbskeho gymnazija Budyšin (SGB) su kónčnu partiju 52. sezony wokrjesnych mišterstwow přećiwo kolegam z Lubija 0:2 přěhrali, ale zawěsćichu sej titul wicemištra mjez šěsć startowacymi šulemi.
Z finalnej hru dotal njeporaženeju wolejbuloweju cyłkow Heinricha Pestalozzijoweje wyšeje šule Lubij a pedagogow Serbskeho gymnazija Budyšin skónči so 52. sezona wokrjesnych mišterstwow při wysokim saku. Wšitcy běchu wulce motiwowani, a tak wuwi so napjate rozestajenje, kotrež so hakle w poslednich mjeńšinach hrajneho časa rozsudźi. Hač na Michała Eiselta nastupichu serbscy pedagogojo w najsylnišej zestawje a nawjedowachu we woběmaj sadźbomaj.
Radwor (SN/BŠe). Sportowe towarstwo 1922 Radwor je chětro wulke. Najwjetši wobłuk drje je tón kopańcy, hdźež maja dorostowe cyłki we wjacorych starobnych skupinach. Nimo wolejbula, aerobiki a gymnastiki za maćerje z dźěćimi maja tež wobłuk blidotenisa. „Poprawom mějachmy wobstajnje štyri mustwa. Nětko su to jenož hišće tři“, rozłožuje Alexander Žur, skupinski nawoda prěnjeho mustwa. Dokelž je starobny přerězk aktiwnych čłonow dosć wysoki, chcyše so Radworčan na polu dorosta sylnišo angažować a zrodźi mysl, dorostowu skupinu załožić. Wot spočatka měrca přeprošowaše wón z dwěmaj pomocnikomaj dźěći so za zelenym blidom wuspytać. A někotři zajimcy su blidotenisej hač do dźensnišeho swěrni wostali.
Póst Germania Budyšin – Sokoł Ralbicy/Hórki 0:3 (0:1)
Zestawa hosći: Schöne – K. Matka, Schultz, Bjeńš, Budar (65. Rawš), Šołta, Gloxyn, Korjeńk, M. Matka, Bejmak (83. Materna), Kurjat (58. Wowčerk)
Fanojo Sokoła Ralbicy/Hórki njemějachu w zašłych hrach wjele k smjeću, wšako běchu jeho koparjo hórke poražki přećiwo Bukecam, Radworjej a minjeny tydźeń doma přećiwo Hnašecam-Dobruši poćerpjeli. Tuž ličachu mnozy hižo z tym, zo sobotu pola robustneho přećiwnika w Budyšinje dalša hra bjez dypka k tomu přińdźe. Tam pak hrajachu Sokoljo kaž wuměnjeni. Dwuboje w srjedźnym polu woni najčasćišo dobywachu, spěšnje hrajachu bule do haski. Tak tež po dźesać mjeńšinach, jako so Křesćan Bejmak po rjanej přihrawce do šěsnatki předrě. Tam bu foulowany, a woprawnjenu jědnatku Denny Gloxyn k 0:1 wěsće přetwori. Delanscy koparjo běchu w prěnim połčasu jasnje lěpši a wuhrachu sej dalše dobre składnosće. Měrćin Kurjat bu před wrotami derje nahraty, jeho třělwa pak dźěše k zadźiwanju wšitkich pódla wrotow. Tež Michał Matka na wrotarju zwrěšći. Jenička wulka šansa z wida hosćićela dźěše na zbožo jenož na žerdź.
Zestawa domjacych: Matješk – Kral, Hanuza, Hoelzel (53. Hrjehor), Pawlik, Hommel, Plaettner, Korjeńk (89. Hahn), Šołta, Čornak (68. Lejnart), Domš
W prěnjej połseriji běchu sej chowancy trenarja Handrija Krawčika z wulkej prócu po 1:1 w Lubušu dypk wuwojowali. Nětko w domjacej partiji při najrjeńšim wjedrje bě lóšt na dobyće tak na tři dypki wězo wulki. Tola hosćo nastupichu z defensiwnym nastajenjom, a za Njebjelčanskich nadběhowarjow bě ćežko dwójne škitne pasmo přewinyć. Wótra třělwa Jakuba Šołty dźěše nimo wrotow (6.) a tež William Plaettner w 19. min. přećiwniske wrota misny. Po přihrawce Olivera Domša běše Daniel Kral w dobrej poziciji, ale hóstny wrotar Danilo Reiche znješkódni třělwu z rjanej paradu (22.). Dźesać mjeńšin pozdźišo posłuži Tomy Hommel Plaettnera, ale tež jeho niski kop wrotarja njepřewiny (32.). Za Njebjelčanow bě tuž ličba šansow w prěnim połčasu wobmjezowana. Tež hosćo so lědma strašnje přesadźichu, a Józef Matješk we wrotach domjacych njeměješe přewjele dźěła. Tak skónči so prěni połčas z mjezywuslědkom 0:0.
Stajnje srjedu do Božeho spěća wotměwa so po tradiciji běh po Krakečanskich hórkach. A tak budźe tomu tež zajutřišim, 29. meje, mjeztym hižo 32. króć. Wubědźowanje organizuje zaso Módro-běłe sportowe zjednoćenstwo Krakecy.
Přizjewjenja su móžne pod www.baer-service.de.
„Maći Boža Róžeńčanska ...“, bě to fatalna situacija za mnje, jako sudźach duel koparjow-starych knjezow Sokoła Ralbicy/Hórki a Hrajneho zjednoćenstwa Rakecy/Šćeńca. Hižo w 11. min. bě so to stało, štož so ći we winowatostnej hrě jako wukubłanemu refereejej stać njesmě. Sym wobě karće zabył, žołtu kaž tež čerwjenu! Pytnych to hakle w tym wokomiku, jako hraješe kopar Sokoła w škiće wotpohladnje z ruku. Jako prěnje započachu mje hosćo ze wšěch kónc wobwliwować a žadachu sej čerwjenu kartu, dokelž bě Ralbičanski hrajer po měnjenju Rakečanow posledni muž. To pak tak njewidźach a doběžach sej k asistentej, kiž běše tohorunja z lěhwa Ralbičanow. W tym wokomiku ani hišće njewědźach, zo wobě karće nimam. Dojednachmoj so z asistentom na žołty kartonk, dokelž njebě škitar Sokoła bul jako posledni muž z ruku hrał. Hakle nětko bě mi jasne: „Sym wobě karće zabył!“ Dokelž pak běch připadnje žołty trikot zdrasćeny, pokazach na njón a so tak wuchowach. Do toho běch so wězo pola wšitkich hrajerjow zamołwił a jim swój problem rozkładł.
Třeći turněr třoch krajow
W Holešowskej Dubrawce wubědźuja so dźensa, jutře a njedźelu dorostowi konjacy sportowcy z Pólskeje, Čěskeje a Němskeje. Mjez nimi su tež wjacori Serbja, tak na přikład Hannah Lehderec, Magdalena Šeferec, Sarah Krječmarjec a Křesćan Zahrodnik. Prěnje wubědźowanja su so hižo zahajili. Poslednje wurisanje dźensa budźe wot 17.20 do 18.40 hodź. skakanje klasy M. Jutře jěchaja a skakaja wot 8 do 18.30 hodź. a njedźelu wot 8.30 do 16.30 hodź. Njedźelny wjeršk budźe w 15.45 hodź. wubědźowanje konjacych zapřahow.
Na XXL-kickerowy turněr
ST 1922 Radwor – Motor Kumwałd 4:1 (2:0)
Zestawa domjacych: Jendrewski – Petschak (53. Hantschick), Bauer, Wjacławk, Šěrak, Měrćink, Glücklich (58. Paška), Henke, Nuk, Wjeńka, Reineke (86. Hettasch)
Po tym zo běchu Radworscy koparjo w pinčnym duelu Bukecy ze 7:1 porazyli, mějachu zašły kónc tydźenja Motor Kumwałd pohosćić. Wšelakich zranjenjow a druhich přičin dla maja tuchwilu tež w Kumwałdźe – kaž druhdźe – problemy z hrajerjemi. Tak nastupichu hosćo jeno z dźesaćomi. Hinak hač hewak poradźi so domjacym dobry start do hry. Kumwałdźenjo koncentrowachu so mjenujcy wot spočatka na škitanje. To hosćićeljo wužichu, přewzachu režiju a postajachu tempo. W prěnim połčasu měješe Julius Jendrewski we wrotach tuž mało dźěła. W 9. min. trjechi Fabian Šěrak z wótreho kuta łatu. Prěni raz juskać móžachu młodźi koparjo z Radworja w 14. min., a to po dobrej přihrawce Johannesa Wjacławka. Stephan Reineke skoči najwyše a zhłójčkowa bul k nawjedowanju do přećiwniskich wrotow. Radwor dominowaše a nadźěła sej dalše móžnosće. W 24. min. přewiny Reineke dweju škitarjow a přetwori ze 16 metrow k 2:0.