Katastrofa! To bě moja prěnja mysl, jako zhonich, zo tučasnje najlěpši a najsuwereniši koparski sudnik Manuel Gräfe staroby dla wjac w prěnjej zwjazkowej koparskej lize Němskeje sudźić njesmě. Horco běchu w minjenych tydźenjach wo tym diskutowali, a nimale wšitcy měnja, zo je tele prawidło wulki kał. Jenož zamołwići Němskeho kopar­ske­ho zwjazka dale za tym steja a wobkru­ćeja prawidło z fluktuaciju – potajkim, zo dyrbja tež nowi sudnicy šansu měć a hry w 1. zwjazkowej lize hwizdać směć: tak na přikład tež Richard Hempel z Großnaundorfa. 23lětny sudnik je w minjenych lětach tajke dobre wukony pokazał, zo je dale a bóle postupował. Wot noweje se­zony smě samo hry w 3. zwjazkowej lize sudźić! Móžu sej jara derje předstajić, zo wuhladamy jeho tuž bórze na koparskej beletaži Němskeje. Před lětami hwizdaše wón raz přećelsku hru mjez Sokołom Ralbi­cy/Hórki a Jednotu Kamjenc. Móžu so hišće jara derje na jeho měrne a njekomplikowane wašnje dopominać.

Sport zaso dowoleny

W Budyskim wokrjesu je pod wěstymi wuměnjenjemi wotnětka zaso dowolene sportować. Tak smědźa so hólcy a holcy pod hołym njebjom w skupinach hač do 20 bjez wěstotneho wotstawka zaso pohibować. Jeničce nazwučowar trjeba aktualny negatiwny test. Tež dorosćeni smědźa wonka na sportnišćach sportować, trjebaja pak wšitcy negatiwny test. Tež w sportowych halach smědźa zaso zwučować. Tu pak płaća krućiše postajenja: Kóžda wosoba dyrbi 20 kwadratnych metrow wokoło sebje k dispoziciji měć, połdrameterski wotstawk ma so dodźeržeć, a wšitcy wobdźělnicy dyrbja negatiwny test předpołožić móc.

Po wodźe „sněhakować“

Wodoskijowa připrawa Wake and Beach w Brězowce (Halbendorf) je jutře a njedźelu wotewrjena. Jutře „sněhakuja“ po wodźe Brězowskeho jězora wot 13 do 15 hodź., wot 15.15 do 17.15 hodź. a wot 17.30 do 19.30 hodź., njedźelu w samsnych časach. W je tež wuwidźeć, kotre naprawy hygieny płaća. Tak mjenowany slot, dwuhodźinske wužiwanje powjaznicy, płaći 26,50 eurow. Wobaj dnjej poskićeja na Brězowskej wodoskijowej připrawje ­tež imbis.

Žabjacy běh hakle za měsac

Steve Schröder

Fota: Torsten Zettl

Jako agilny, fleksibelny, spěšny, sylny při wotzamknjenju a dobry přihrawar płaći Julien Hentsch, kiž je, kaž hižo wulki dźěl jeho sobukoparjow, njedawno swój kontrakt z Budissu Budyšin podlěšił. Wón je tež jara hordy, zo smě dale na Młynkec łuce respektiwnje w Humboldtowym haju za bulom honić. Najradšo pak před fanami. Nadźijomnje so to potom w nowej sezonje zešlachći.

Z Martinom Zoulom su tež słužby prěnjeho wrotarja za přichodne hrajne lěto zaručene. Čěski teamowy hrajer je prěnje třělwy w starobje sydom lět za TJ Spartak Chrastava wotwobarał. Hižo z jědnaće lětami dźěše wón k wuznamnemu koparskemu klubej Slovan Liberec, hdźež je w mustwach na runinje juniorow kaž tež tři sezony pola rezerwy muži wusahowace wukubłanje dožiwił. Z 20 lětami rozsudźi so za nawrót k Spartakej Chrastava. Tam měješe mjez druhim česć, z Jiříjom Stajnerom, něhdyšim profijowym koparjom zwjazkoweho ligista Hannover 96, hromadźe hrać.