Prof. Edward Wornar wot Załožby za serbski lud přesłapjeny

Budyšin (SN/CoR). Njeje jasne, hač so lětsa­ Serbska lětnja šula na Lipšćan­skim Instituće za sorabistiku wotměje. „Sym přesłapjeny. Bych sej wot Załožby za serbski lud wjace podpěry přał“, roz­łožuje direktor instituta prof. dr. Edward Wornar „sym so dwójce telefonisce ze zamołwitej załožby rozmołwjał, a su mi jasnje prajili, zo žane rěčne šule njefi­nancuja. To mje jara dźiwa. Wšako móžeš w směrnicach za spěchowanje na internetnej stronje załožby čitać, zo wona rěčne kursy za hornjo- a delnjoserbšćinu podpěruje. A wěmy tež z praksy, zo je ferialny kurs Budyskeho Serbskeho insti­tuta prawidłownje financowała.“