Na olympiadu serbšćiny poručenje

pjatk, 06. apryla 2018
artikl hódnoćić
(0 )

Wulka je ličba šulerjow z maćernorěčnymi kmanosćemi

Wodowe Hendrichecy (SN/MiR). Lětsa wotměje so mjeztym 52. olympiada serbšćiny. Wot póndźele do srjedy chcedźa so w dźěćacym wočerstwjenskim centrumje KiEZ Querxenland Wodowych Hendrichec wuknjacy 6. lětnika wubědźować a najlěpšich při nałožowanju serbšćiny zwěsćić. „Je a wostanje wažna naležnosć, šulerjam składnosć dawać, swoje wukony měrić směć. Za to bě a je olympiada dobra přiležnosć“, praji Ludmila Budarjowa, předsydka Serbskeho šulskeho towarstwa, kotrež je nošer kubłanskeho zarjadowanja.

73 šulerjow z dwanaće wyšich šulow a gymnazijow je na olympiadu přizje­wjenych, mjez nimi 19 z Delnjeje Łužicy. Dźesaćo wuknu tam delnjoserbšćinu na zakładnych šulach w Žylowje, Brjazynje a Tšupcu, dźewjećo na Choćebuskim Delnjoserbskim gymnaziju. Z Hornjeje a srjedźneje Łužicy je 54 wobdźělnikow-olympionikow přizjewjenych, a to ze šěsć wyšich šulow – Budyšin, Kulow, Radwor, Ralbicy, Worklecy a Slepo – kaž tež z dweju gymnazijow – Serbski gymnazij Budyšin a Lessingowy gymnazij Wojerecy.

wozjewjene w: Kubłanje
Prošu přizjewće so, chceće-li komentar podać

Serbska debata

nowostki LND