Abiturienća měli do swěta hić a to najlěpše domoj do Łužicy sobu přinjesć
Budyšin/Chrósćicy (SN/MiR). 69 z 72 lětušich maturantow Serbskeho gymnazija Budyšin je pruwowanja wobstało a přija sobotu w Chróšćanskej „Jednoće“ swoje abiturne wuswědčenja, kotrež jim šulski nawoda René Wjacławk přepoda. Dźewjeć maturantow měješe přerězk 1,5 abo lěpši. Annabell Mehnertec z Budyšina docpě přerězk 1,2. Najlěpšej běštej Halina Pohončec z Wotrowa a Luiza Šubertec z Kamjenca z přerězkom 1,1. Předsydka spěchowanskeho towarstwa gymnazija dr. Cordula Ratajczakowa rjekny: „Čuju so z tymle lětnikom wosebje zwjazana. Wšako smědźach z nim zhromadnje za slědźerski projekt dźěłać.“ Wona přepoda wšitkim dźewjećom lětny abonement kulturneho časopisa Rozhlad.