Wučer a wuspěšny sportowc był

wutora, 14. septembera 2021
artikl hódnoćić
(0 )
 Gerat Hrjehor Foto: Werner Müller Gerat Hrjehor Foto: Werner Müller

Wo 87lětneho Gerata Hrjehorja žaruje nimo swójby a přiwuznych tež wulka syła něhdyšich šulerjow Serbskeje (rozšěrjeneje) wyšeje šule resp. Serbskeho gymnazija kaž tež swójba Sokołow. Tójšto wuknjacym bě njeboćički w lětomaj 1955 a 1956 a po tym wot 1961 do 1997 woblubowany sportowy wučer. Město krutosće pozbudźowaše wón chowancow radšo ze žortnym přispomnjenjom (Ty drje maš puding w rukomaj, štož jemu za zło njebjerjechu. Tež jeho přimjeno Ludźik na žadyn pad lózyske njebě).

Sam bě Gerat Hrjehor we wolejbulu a kopańcy aktiwny. Hižo jako šuler Serbskeho gymnazija w Českej Lípje a Varnsdorfje wot decembra 1945 hač do julija 1949 bě so za sport zajimował. Po nawróće do domizny přisłušeše wón mustwu Serbskeje wyšeje šule (SWŠ), kotrež sej 1951 titul młodźinskeho mištra Sak­skeje wuwojowa a lěto pozdźišo samo hišće ­wicemišterstwo. Z Geratom běchu w mustwje Jakub Wjacławk, Jan Wornar, Pětr Šołta, Gerat Libš, Manfred Adam a Mikławš Křižank. Pisar tohole spominanja hraješe z Geratom wot 1964 za Rotaciju Budyšin kopańcu we wokrjesnej klasy.

wozjewjene w: Kubłanje
Prošu přizjewće so, chceće-li komentar podać

nawěšk