Na Johanneumje staraja so wo přistojne mjezsobne wobchadźenje

Wojerecy (SiR/SN). Hišće su zymske prózdniny w Sakskej. Póndźelu pak so zaso wšědny dźeń na šulach započina. Nimo wuwučowanja słuša do toho mjeztym tež šulske socialne dźěło, kotrež ma problemam šulerjow wotpomhać a konfliktam zadźěwać. Na Wojerowskim Johanneumje, swobodnej křesćanskej šuli, hdźež šulerjam tež serbšćinu spřistupnjeja, skutkuje trenarka, kotraž so oficialnje „coach“, potajkim nazwučowarka za šulerjow mjenuje. Wona ma kedźby­hódny profil nadawkow, tohodla smy so nětko z njej rozmołwjeli.

45lětna mać třoch dźěći dźěła za towarstwo „Ewangelske młodźinske dźěło regiona Wojerec“ a widźi swój job w Johanneumje jako „dar njebjes“. K profilej trenarki Silvije Scheibe słušeja rozmołwy runje tak kaž zwučowanja dźěći a młodostnych. W srjedźišću steji zdwórliwe mjezsobne wobchadźenje, zo bychu dźěći a młodostni spóznali: Tež hdyž maš jónu po začuću hubjeny dźeń, maš so přistojnje druhim ludźom napřećo zadźeržeć. Tež tajke fundamentalne wěcki kaž prawe dychanje słušeja po potrjebje do treninga.