Berlin (dpa/SN). Němska wotwěra nětko swoju mjezu staćanam z jědnaće krajow zwonka Europskeje unije, kaž je zwjazkowe knježerstwo wčera wobzamknyło. To płaći za Awstralsku, Georgisku, Kanadu, Montenegro, Nowoseelandsku, Thailandsku, Tunezisku a Uruguay. Za Japansku, Južnu Koreju a Chinu wolóženja jenož płaća, hdyž tež wone ludźom z Němskeje zaso zapućować dowoleja.

Z noworjadowanjom, po kotrymž chce mjezu za ludźi ze 14 krajow zwonka EU wotewrěć, ma so Němska w dalokej měrje po wobzamknjenju čłonskich statow Europskeje unije. Lisćina budźe stajnje po dwěmaj tydźenjomaj předźěłana.

Rozsudne za to, zo Němska wob­mje­zowanje pućowanja zběhnje, je poměrnje snadna ličba nowonatyknjenjow z koronawirusom w minjenych 14 dnjach. Nimo toho chcedźa na to hladać, kak w potrjechenych krajach z koronapandemiju wobchadźeja. Pućowacy z tak mjenowanych rizikowych kónčin dyrbja dale do dwutydźenskeje karanteny, njemóža-li negatiwny test na koronu předpołožić.

Wjetšina wolerjow so za daleknježenje prezidenta wuprajiła

Moskwa (dpa/SN). Ruski prezident Wladimir Putin móže po přiwzaću noweje wustawy kraja z wjace prawami hišće wjele lět dale knježić. Při ludowym wothłosowanju dósta Zakładny zakoń, z kotrymž móhł 67lětny hač do 2036 – dalšej šěsćlětnej dobje po lěće 2024 – knježić, 78 procentow přihłosowanja. Něhdźe 21 proc. wolerjow bě přećiwo tomu. Wólbne wobdźělenje wučinješe po informacijach wólbneje komisije 65 proc.

Njewotwisni wobkedźbowarjo běchu za čas sydom dnjow trajaceho wothłosowanja, kotrež so wčera wječor skónči, sta ranjenjow wólbneho prawa registrowali. 110,5 milionow ludźi najwjetšeho kraja swěta bě namołwjenych, swój hłós wotedać. Nowa wustawa, kotraž bě na iniciatiwu prezidenta Putina nastała, přilubja tójšto socialnych dobrotow, kaž tu, zo chcedźa kóžde lěto renty přiměrić.

Berlin (dpa/SN). Pućowanski wobchad na dotalnymaj Berlinskimaj lětanišćomaj dožiwi po słowach wobhospodarjerja w přichodnym času zaso wulki rozmach. „Wočakujemy w juliju 20 000 pasažěrow wob dźeń, kónc měsaca hač do 30 000“, rjekny šef lětanišćow Engelbert Lütke Daldrup wčera w Berlinje. Hłowna přičina je wožiwjeny wobchad přez Berlinskeho najwjetšeho poskićerja easyjet. Cyłkownje je tam wot wčerawšeho zaso 36 lětanskich přede­wzaćow w Tegelu a Schönefeldźe aktiwnych. Wone lětaja do něhdźe 100 městow w 40 krajach.

Wšědna ličba pasažěrow w lětadłach so hač do kónca měsaca potroji. W juniju njeběchu wšědnje wjace hač 8 000 ludźi zličili. Přiwšěm je sej Lütke Daldrup ­„wěsty, zo traje hišće wjacore lěta, doniž njebudźe niwow časa do korony docpěty. W Berlinje z tym ličimy, zo změjemy za tři abo štyri lěta zaso status quo, kaž mějachmy jón loni. To bě něhdźe 35 milionow pasažěrow nad Berlinom po puću, lětsa budźe jich wo wjele mjenje.“

Koronapandemije dla bě lětanski wobchad w Berlinje a druhdźe wotsrjedź měrca nimale dospołnje zlemjeny.

Kruwy nastróžić a to w interneće prezentować njeje žadyn žort, ale smjerć strašne a na njedobro derjeměća skotu. Na to skedźbnja Němski zwjazk ratarjow. Hłowna přičina kritiki je nowy trend na internetnej platformje TikTok. Tam ludźo z rukomaj machajo kruwam napřećo smala, doniž wone panisce njećěkaja. Wideja na to w interneće pokazuja. Ratarjo warnuja: Kruwa je hač do 700 kilogramow ćežka a móže njemdrje reagować.

Diamant je na internetnej awkciji wjace hač dwaj milionaj dolarow wunjesł. Je to najwyša płaćizna, kotruž su hdy na ryzy internetnym přesadźowanju docpěli, zdźěla awkciski dom Christie’s w New Yorku. 31 ludźi ze štyrjoch krajow bě so online wo diamant wubědźowało. Dobyćer zapłaći 2,1 milion dolarow, štož je něhdźe 1,9 milionow eurow.