Wolóženje Rolanda Ermera minjeny pjatk we Wojerowskej Łužiskej hali bě widźomne: 97 procentow přitomnych čłonow CDU bě so za njeho jako direktneho kandidata strony we wólbnym wokrjesu 156 k wólbam zwjazkoweho sejma wuprajiło. Do toho wšak bě Njedźichowčan wo runje tajku wulku podpěru prosył, zo móhł ze sylnym mandatom do wólbneho boja hić. Što jemu 97 procentow woprawdźe pomha, pak so potom najpozdźišo 26. septembra pokaza. Wčerawše wólbne wuslědki w Badensko-Württembergskej a Porynsko-Pfalcy dźě njejsu Ermerej woprawdźity wětřik wotzady, skerje nawopak. We woběmaj krajomaj je CDU dalše hłosy zhubiła. Mjeztym jewja so hłosy, kotrež žadaja sej nowe knježerstwowe konstelacije – bjez CDU. Hač k wólbam zwjazkoweho sejma je drje hišće šěsć měsacow chwile, ale hižo nětko so dźeń a bóle pokazuje, zo je so čas po Angeli Merkel (CDU) započał. Zo móže ju nowy předsyda CDU Armin Laschet narunać, je dwělomne. Marko Wjeńka

Dawno znješkódnjena bomba je we Weissachu pola Stuttgarta zasadźenje policije zawiniła. W nadawku bydlenjo­twarskeho předewzaća běchu wjacori so­bu­dźěłaćerjo garažu wotewrěli. Tam namakachu pozdatnje strašny objekt. Policija da na to hłownu dróhu zawrěć. Fachow­cy pak spěšnje zwěsćichu, zo bě bomba drje originalna, ale bjez rozbuchadła. Wona słušeše domizniskemu towarstwu, kotrež wužiwaše garažu jako skład.

Tři metry dołhi krokodil je wohnjowych wobornikow w Čěskej nastróžił. Wobornicy běchu woheń na třěše zahrodoweho domu w gmejnje Klopina 190 kilometrow wuchodnje Prahi hašeli. Na to chcychu w domje nutřka hladać, hač so tam něhdźe něšto dymi. To tam krokodil wokoło łažeše. Fachowc jeho popadny. Kak bě reptil do domu přišoł a hač tam legalnje přebywa, chcedźa nětko přepytować.

Drježdźany (SN/JaW). Połoženje Serbow w ewangelskim wosadnym zwjazku tworješe srjedźišćo wčerawšeje rozmołwy předsydy Domowiny Dawida Statnika z biskopom Ewangelsko-lutherskeje krajneje cyrkwje Sakskeje Tobiasom Bilzom w Drježdźanach.

W dwuhodźinskej rozmołwje rozprawješe předsyda Domowiny biskopej wo stawiznach a aktualnej situaciji serbskeho ludu. Mjez druhim Dawid Statnik wu­zběhny, zo je „nimo swójby a kubłanišća cyrkej mnohim Serbam jenički rěčny rum“, rěka nowinskej zdźělence Domowiny. Nastupajo Hodźijsku wosadu poruči Statnik rozmołwu ze Serbskim wosadnym zwjazkom. Rozjimać měli přede­wšěm prašenje, kak Bože słowo w serbšćinje pod datymi wuměnjenjemi zaručić.

Washington (dpa/SN). Prezident USA Joe Biden chce šćěpjenski porjad w kraju zběhnyć a najpozdźišo wot 1. meje wšitkim dorosćenym w USA zmóžnić so pře koronawirus šćěpić dać. Zaměr je, dźeń njewotwisnosće 4. julija „normaliće zbližić“, kaž z Běłeho domu rěka. Knježerstwo chce zaručić, zo móža woprawdźe kóždeho dorosćeneho šćěpić. Tak chcedźa ličbu apotekow a strowotniskich centerow, w kotrychž šćěpja, jasnje rozšěrić.

Spahn: Serum wot apryla

Berlin (dpa/SN). Po přizwolenju noweho šćěpiwa předewzaća Johnson&Johnson njeliči zwjazkowy minister za strowotnistwo Jens Spahn (CDU) z tym, zo budźe serum hnydom k dispoziciji. Wón wočakuje najzašo srjedź abo kónc apryla prěnje posyłki, kaž sćelakej ARD rjekny. W tym zwisku chcył Spahn wědźeć, čehodla druhe kraje serum hižo dóstawaja a hdy budźe EU na rjedźe. Rozmołwy wo tym wjedźe Europska komisija. Serum pochadźa z USA, hdźež je faktisce zaka­zane šćěpiwo pře koronu wuwožować.

Šćěpjenje lěkarjam přewostajić