Mainz/Stuttgart (dpa/SN). Po historiskej wólbnej poražce w Badensko-Württembergskej a Porynsko-Pfalcy pyta CDU za pućemi z krizy. Šěsć měsacow do wólbow zwjazkoweho sejma žada sej zwjazkowa ministerka za kubłanje Anja Karliczek (CDU) wjace zhromadnosće a jednoty w boju přećiwo koronapandemiji. „Wšitke rozsudy měli so po móžnosći w přezjednosći tworić. To je to, štož wobydlerjo w časach pandemije wot unije wočakuja“, rjekny wona powěsćerni dpa.
Bywšemu wobswětowemu ministrej CDU Norbertej Röttgenej je wólbny wuslědk jasny signal na adresu strony. „CDU dyrbi so tomu jako cyłk wobarać“, rjekny čłon prezidija strony nowinarjam. CDU dyrbjała spěšnje a spušćomnje dopokazać, „zo je šćěpjenje a testowanje dźěl jeje strategije w boju přećiwo pandemiji“. Městopředsyda frakcije CDU/CSU w zwjazkowym sejmje Carsten Linnemann rjekny: „CDU dyrbi skónčnje dopokazać, zo management přećiwo koronje wobknježi.“
Budyšin (SN). Předsydstwo Serbskeho wosadneho zwjazka (SWZ) je na swojim schadźowanju minjeny štwórtk znowa wo aktualnej situaciji strukturneje změny w sakskej krajny cyrkwi dla wuradźowało. Jeho znapřećiwjenje přećiwo wutworjenju sotrowskeho cyrkwinskeho poměra wjacorych wosadow w regionje mjez Budyšinom a Biskopicami cyrkwinskeho wobwoda Budyšin-Kamjenc, mjez druhim Hodźijskeje a Hušćanskeje, bě krajnocyrkwinski zarjad w Drježdźanach wotpokazał. Nětko je so zwjazk prawnisce poradźować dał a zwěsćił, zo nima skóržba přećiwo wotpokazanju wuhlady na wuspěch. Tuž so tajkeho kroka wzda, kaž SWZ sobotu informowaše. Předsydstwo pak wita, zo staj so wyšej krajnocyrkwinskaj radaj Thilo Daniel a Klaus Schurig na wopyt a rozmołwu přizjewiłoj.
Serbskemu wosadnemu zwjazkej přisłušeja zastupjerjo a zastupjerki dwurěčnych wosadow Ewangelsko-lutherskeje krajneje cyrkwje Sakskeje. Swoju lětušu hłownu zhromadźizna chce SWZ 8. meje w Hodźiju přewjesć.
Dawno znješkódnjena bomba je we Weissachu pola Stuttgarta zasadźenje policije zawiniła. W nadawku bydlenjotwarskeho předewzaća běchu wjacori sobudźěłaćerjo garažu wotewrěli. Tam namakachu pozdatnje strašny objekt. Policija da na to hłownu dróhu zawrěć. Fachowcy pak spěšnje zwěsćichu, zo bě bomba drje originalna, ale bjez rozbuchadła. Wona słušeše domizniskemu towarstwu, kotrež wužiwaše garažu jako skład.
Tři metry dołhi krokodil je wohnjowych wobornikow w Čěskej nastróžił. Wobornicy běchu woheń na třěše zahrodoweho domu w gmejnje Klopina 190 kilometrow wuchodnje Prahi hašeli. Na to chcychu w domje nutřka hladać, hač so tam něhdźe něšto dymi. To tam krokodil wokoło łažeše. Fachowc jeho popadny. Kak bě reptil do domu přišoł a hač tam legalnje přebywa, chcedźa nětko přepytować.
Drježdźany (SN/JaW). Połoženje Serbow w ewangelskim wosadnym zwjazku tworješe srjedźišćo wčerawšeje rozmołwy předsydy Domowiny Dawida Statnika z biskopom Ewangelsko-lutherskeje krajneje cyrkwje Sakskeje Tobiasom Bilzom w Drježdźanach.
W dwuhodźinskej rozmołwje rozprawješe předsyda Domowiny biskopej wo stawiznach a aktualnej situaciji serbskeho ludu. Mjez druhim Dawid Statnik wuzběhny, zo je „nimo swójby a kubłanišća cyrkej mnohim Serbam jenički rěčny rum“, rěka nowinskej zdźělence Domowiny. Nastupajo Hodźijsku wosadu poruči Statnik rozmołwu ze Serbskim wosadnym zwjazkom. Rozjimać měli předewšěm prašenje, kak Bože słowo w serbšćinje pod datymi wuměnjenjemi zaručić.
Washington (dpa/SN). Prezident USA Joe Biden chce šćěpjenski porjad w kraju zběhnyć a najpozdźišo wot 1. meje wšitkim dorosćenym w USA zmóžnić so pře koronawirus šćěpić dać. Zaměr je, dźeń njewotwisnosće 4. julija „normaliće zbližić“, kaž z Běłeho domu rěka. Knježerstwo chce zaručić, zo móža woprawdźe kóždeho dorosćeneho šćěpić. Tak chcedźa ličbu apotekow a strowotniskich centerow, w kotrychž šćěpja, jasnje rozšěrić.
Spahn: Serum wot apryla
Berlin (dpa/SN). Po přizwolenju noweho šćěpiwa předewzaća Johnson&Johnson njeliči zwjazkowy minister za strowotnistwo Jens Spahn (CDU) z tym, zo budźe serum hnydom k dispoziciji. Wón wočakuje najzašo srjedź abo kónc apryla prěnje posyłki, kaž sćelakej ARD rjekny. W tym zwisku chcył Spahn wědźeć, čehodla druhe kraje serum hižo dóstawaja a hdy budźe EU na rjedźe. Rozmołwy wo tym wjedźe Europska komisija. Serum pochadźa z USA, hdźež je faktisce zakazane šćěpiwo pře koronu wuwožować.
Šćěpjenje lěkarjam přewostajić
Markkleeberg (dpa/SN). Sakska ministerka za strowotnistwo Petra Köpping zasadźa so za změnu kriterijow při wšoněmskim rozdźělowanju seruma přećiwo koronawirusej. We wosebje potrjechenych kónčinach, na přikład podłu saksko-čěskeje mjezy, dyrbjeli hinak postupować, rjekny politikarka SPD wčera w Markkleebergu, hdźež bě wona seniorski centrum wopytała.
Čěska je tuchwilu jedne z infekciskich ćežišćow w Europje. Sakska bě so tuž rozsudźiła, w susodnym Vogtlandskim wokrjesu šćěpjenski porjad zběhnyć a wšitkich wobydlerjow nad 18 lětami šćěpić. „Hdyž pak nam ze stron stata přidatny serum njepřewostaja, to rěka, zo dyrbju šćěpiwo druhim wzać“, rjekny Petra Köpping. Kriterije šćěpjenja měli so tuž po wšej Němskej znowa rjadować.
Ze šćěpjenjom wosebje wohroženych wobydlerskich skupin, na přikład w starownjach a hladarnjach, su mjeztym nimale hotowi, kaž ministerka zdźěli.