Na halowu kopańcu we Worklecach
Ralbičenjo nowi Jendźelčenjo – Kulowčenjo piwowy cup dobyli
Na tradicionalny halowy turněr Kulowskeje piwarnje běchu sej koparjo z karnewaloweho městačka šěsć mustwow přeprosyli a dwaj cyłkaj sami stajili. Hrali su w dwěmaj staflomaj, w kotrymajž kwalifikowaštej so stajnje prěni a druhi za połfinale. Hrajny čas wučinješe dwanaće mjeńšin.
W stafli I kopaše prěnja garnitura Módro-běłych Kulow. Wona wšitke partije doby. Jako druhi zaćahny do semifinala Jednota Wojerecy. K zadźiwanju přihladowarjow bu zakitowar pokala z Grodka jenož posledni.
W stafli II hrajachu Ralbičenjo hnydom přećiwo Kulowskej rezerwje a dobychu přez wrota Handrija Jakubaša a Thomasa Schulza z 2:0. W druhej hrě Sokoła přećiwo Großröhrsdorfej přećiwnik nawjedowaše. Ralbičanam pak nochcychu so wrota poradźić. Samo wrotarja woni wuměnichu, skónčnje pak 0:2 podležachu. Tak rěkaše, třeći duel přećiwo sylnemu cyłkej z Weixdorfa dobyć, štož so přez wrota Jakubaša poradźi.
Hrajna scena z halowych wokrjesnych mišterstwow minjenu sobotu mjez ...
Dobyli drje žanu hru njejsu – wrotar wubranki pak najlěpši był
Po swojej premjerje loni w juliju z hru přećiwo Serbskej koparskej wubrance z Hornjeje Łužicy je so nowozałožene delnjołužiske mustwo Serbske koparje nětko druhi raz zjawnosći předstajiło. Přeprošene bě wone minjenu sobotu na 25. halowy koparski turněr wo Brunicowy cup we Łužiskej arenje w Choćebuzu. Tam wubědźowaše so z najlěpšimi cyłkami krajneje ligi a klasy w Choćebuskej kónčinje. Dźesać mustwow wojowaše w dwěmaj staflomaj wo dypki a dobyće. Serbscy koparjo z Depska, Drjenowa, Dešna, Brjazyny a z Bórkowow, mjez nimi šulerjej Delnjoserbskeho gymnazija, su mócnje wojowali. Su pak cyłkam VfB Choćebuz (1:3), Gołkojce (1:3) a Grodk (3:4) přiwšěm podleželi. Přećiwo Bórkowam docpěchu njerozsudne 1:1. Najebać to dóstachu sympatiju a podpěru publikuma. A Dennisa Schrötera z Dešna počesćichu jako najlěpšeho wrotarja turněra, kotryž bě towarstwo Frischauf Brjazyna organizowało. Wone je z wjace hač 220 čłonami jedne z najwjetšich sportowych zjednoćenstwow w Choćebuskej kónčinje.
Nazhonići wolejbulisća młodu móc přewinyli
Z tradiciju w Pančicach je, zo wuhotuja wolejbulisća tamnišeho sportoweho towarstwa mjez hodami a silwestrom swój nowolětny turněr.
Kaž kóžde lěto su tež wosebje w gmejnje wo mustwa wabili, wšako ma wubědźowanje ludosportowy charakter a měri so přewažnje na swójbne a wjesne cyłki. Tež hdyž so termin tónkróć z koparskim turněrom Worklečanskeje skupiny CDU křižowaše, bě jědnaće wolejbulowych mustwow 30. hodownika do Pančičanskeje hale přišło.
Wot připołdnja hrajachu w Pančicach-Kukowje cyłki ze wsy, z Miłoćic, Kašec a dalšich wokolnych wsow, haj samo ze Šunowa, přećiwo sebi w dwěmaj staflomaj. W prěnjej stafli wopokazachu so koparjo-stari knježa spěšnje jako faworit. Tež w druhej stafli tukaše wjetšina na jasne dobyće Kukowskich hólcow a muži. Zbytk hrow pak bě jara wurunany. Kóžde zastupnistwo smědźeše so radować nad dobyćemi, ale dyrbješe tež raz poražene z pola hić. Tak njezadźiwa, zo rozsudźichu na kóncu małe dypki wo dalšim wotběhu turněra. Prěnjej mustwje wobeju staflow hraještej nětko přez křiž přećiwo sebi. Tak přewinychu Kukowčenjo mustwo z Miłoćic.
Choćebuženjo dalši test znowa jasnje přěhrali
FC Energija Choćebuz – 1. FC Magdeburg 0:4 (0:2)
Kaž hižo přećiwo Halleskemu FC su Choćebuscy koparjo tež načolnikej třećeje ligi, přećiwo 1. FC Magdeburg w swójskim stadionje z 0:4 podleželi. Tule so jim scyła ničo njeporadźi.
Hosćo z Magdeburga (FCM), kotřiž startuja hižo za tydźeń w Großaspachu do druheje połserije, započachu w prěnjej połojcy z najlěpšej formaciju. Ta běše jasnje sylniša hač prěnja zestawa hosćićela. Do partije běchu so zamołwići na njewšědny hrajny čas dwójce 60 mjeńšin dojednali, dokelž bě pola hosći w treningowym lěhwje přihotowanska hra wupadnyła.
Magdeburgski trenar Jens Härtel dósta tak móžnosć, spočatk druheho połčasa kompletnje nowe mustwo na hrajnišćo pósłać. Čerstwa jědnatka nuzowaše koparjow Energije k běhanju za hosćimi. Bě jasnje spóznajomne, zo mocy pola domjacych w druhim přechodźe popušćichu. Wjacore razy dyrbješe Energija zestawu přestajić. FCM pak móžeše so wucychnować.
Přihotuja volleyballowy turněr
Silwester wo połnocy je so přizjewjenski čas za 36. sokołski volleyballowy turněr wo pokal Domowiny skónčił. Někotre dny pozdźišo Serbski Sokoł wozjewi, zo bě so jenož dwanaće mustwow za turněr přizjewiło. Hladajo na ličby w lětach 2017 (20), 2016 (20), 2015 (20) a 2014 (22) je to chětro mało. Za sportowu redakciju Serbskich Nowin je so Jurij Bjeńš z městostarostu Tomašom Šołtu rozmołwjał.
Sće tež překwapjeni byli, zo je so jenož dwanaće mustwow přizjewiło?
T. Šołta: Na wězo: loni 20, lětsa dwanaće – to je jara wulki rozdźěl. Na njedawnym posedźenju předsydstwa Serbskeho Sokoła pak steješe na přizjewjenskej lisćinje hišće třinaty cyłk, kotryž bě hakle spočatk januara přizjewjenski pjenjez přepokazał.
Třinaće pak tež njeje runjewon optimalna ličba za volleyballowy turněr ...
T. Šołta: Wěm, zo so nawoda turněra Jan Hrjehor tuchwilu wo štyrnate, pjatnate a 16. mustwo prócuje a zo je so dalše hižo přizjewiło. Jedne abo dwě wjace by wězo lěpje było.
Što su přičiny snadneje ličby přizjewjenjow a hišće w januarje, byrnjež termin 31. decembra był?
Respektabelny wukon pokazali
Energija prěni test jasnje přěhrała
FC Energija Choćebuz – Halleski FC 0:4 (0:2)
Dwoje spěšne wrota po kapitalnymaj zmylkomaj w škiće přećiwo třećemu koparskemu ligistej z Halle w prěnich mjeńšinach wodźachu hru spěšnje do jednoho směra. Energija sej po wrotach něhdyšeho Choćebužana Matthiasa Fetscha (4., 13.) přiwšěm wjacore dobre móžnosće nadźěła. Gabriel Boakye, Maximilian Zimmer, Kevin Weidlich a Streli Mamba pak njemóžachu je wužić. Tónle manko partiju, kotraž njebě jednostronska, naposledk rozsudźi.
Dalše wrota w druhim połčasu třělištaj Martin Ludwig (74.) a Hilal El-Helwe (87.). Nimo toho zastupjerjo medijow zwěsćichu, zo pobrachuje młodym akteram, kotřiž w druhim połčasu na woběmaj stronomaj hrajachu, hišće trěbna měrnosć při bulu.
Widźał,słyšał, napisał (15.01.18)
Awtor dźensa
Toni Ryćer
Prěnje wuznamne motorsportowe zarjadowanje spočatk kóždeho lěta je Rallye Dakar. Tele po zdaću najnaročniše wubědźowanje je přeco njesměrnje wulke wužadanje za jězdźerjow a techniku. Prěnja „Dakar“ startowaše 1978 w Parisu. Tehdy mjenowaše so oficialnje Rallye Paris-Dakar a wjedźeše woprawdźe z francoskeje stolicy do hłowneho města Senegala na afriskim kontinenće. Z wěstotnych přičin su motorsportowe wurisanje w lěće 2008 wotprajili. Organizatoram běchu z terorowym nadpadom napřećo wobdźělenym sportowcam hrozyli. Dokelž pak so wosebje awtomobilowe twornje za dalewjedźenje jara prestižneho a lukratiwneho podawka zasadźachu, so zamołwići rozsudźichu jenož hišće jako Dakar pomjenowanu rallye w Južnej Americe přewjesć. Mnohim přiwisnikam tohole sporta so radikalna změna njelubješe, přetož bojachu so, zo so jara naročny charakter pominje. Ale hižo po prěnim lěće 2009 skeptikarjo womjelknychu. Čara přez peruske pusćiny, boliwiske wysočiny a dźiwje přestrjenje Argentinskeje wopokazachu so jako najćešo wobknježomne wužadanja.
