Kulow (AK/SN). Chětro změnjenu strukturu wohnjoweje wobory předwidźa nowe wohnjowoborne wustawki města Kulowa, kotrež je měšćanska rada wčera wobzamknyła. „Koncentrujemy so přichodnje na štyri wjesne wohnjowe wobory, kotrymž su hašenske skupiny přirjadowane“, rozłoži nawoda wobornikow Jurij Brösan. Tak přisłušeja Kulowskej woborje skupiny w Brěžkach, Klóšterskej Nowej Wsy, Hózku a Rachlowje, Salowska wobora změje Koćinsku skupinu po­boku, Sulšečanskej woborje je skupina w Dubrjenku přirjadowana a Mučowskej woborna skupina w Spalach.

Nowa struktura ma po słowach Jurja Brösana někotre lěpšiny. Za nawodu hašenskeje skupiny dosaha wukubłanje jako skupinski nawoda. Komuna koncentruje swoju hašensku techniku na štyrjoch hłownych městnach. Wobchowujo hašenske skupiny zachowaja sej mjeńše wsy wažny dźěl swojeje identity, wšako so runje wohnjowi wobornicy při najwšelakorišich składnosćach na dobro wobydlerjow angažuja­.