Kumwałd (HS/SN). Gmejna Njebjelčicy je sej w lětušim wurisanju „Twarić na wsy“ druhe městno w kategoriji „Nowo- a přitwary“ zdobyła. Delegacija zastupnikow komuny móžeše myto njedawno z rukow sakskeho statneho ministra za wobswět, ratarstwo a geologiju Thomasa Schmidta (CDU) w Kumwałdskim hotelu „Módra kula“ za nowotwar Njebjelčanskeje pěstowarnje přijimać. Přepodata plaketa budźe bórze při dźěćacym přebywanišću připrawjena, a dobyte pjenježne myto chcedźa za mjeńše pěstowarske naležnosće nałožić.