Poprawom chcyše so přeco hižo z weterinarom stać, a skónčnje je sej tónle són tež spjelnił. 37lětny Pětr Vicka z Lutobča je wot lětušeho skótny lěkar.
Wuchodźiwši Serbski gymnazij w Budyšinje zahaji wón 1996 wukubłanje na fyzioterapeuta. Dwě lěće w tym powołanju dźěłaše. Po njeličomnych dalekubłanjach skutkowaše wot lěta 2003 jako docent a je sam fyzioterapuetow wukubłał. Tola žadosć za weterinarnej medicinu bě sylniša: Lěta 2009 započa mjeztym 31lětny Lutobčan w Lipsku weterinarnu medicinu studować. Tež nimo studija měješe hišće tójšto dźěła: W Lutobču je sej w tym času chěžku natwarił. Mandźelska, wučerka na Radworskej serbskej wyšej šuli, jeho podpěrowaše. Hišće za čas studija narodźištej so jimaj holčce, mjeztym mataj mandźelskaj třeću dźowku.
