Wjelk dale wobydlerstwo pači

pjatk, 12. februara 2016
artikl hódnoćić
(0 )

Wjelk bě wčera ćežišćo zhroma­dźi­zny w Róžeńće. Žane druhe zwěrjo woby­dlerstwo tež we Łužicy tak njepači.

Róžant (SN/JaW). Diskusija a prašenja postajowachu informa­ciske zarjadowanje kontaktneho wjelčeho běrowa wčera w Róžeńće. Wjelk bě ćežišćo, a tón ma mjez Serbami přiwisnikow kaž tež přećiwnikow. „Runje tohodla je wažne informować. Njewěda je wulka“, rjekny projektowa nawodnica kontaktneho běrowa Vanessa Ludwig Serbskim Nowinam.

K zahajenju postrowi młoda Róžeńčanka Sofija Liehnec, swobodna referentka w běrowje, něhdźe 40 přitomnych serbsce. Zhromadnje z Vanessu Ludwig poda wona tójšto faktow. Tak je tuchwilu w Němskej 31 wjelčich črjódow žiwych, dźesać z nich w Sakskej. Róžeńčanske wobsteji z lěta 2013 a ma aktualnje štyri młodźata. Loni přizjewichu w kónčinje 22 nadpadow wjelka, w pjeć padach njebě skót dosć škitany. Tež škitnym naprawam a spěchowanju so Vanessa Ludwig wě­nowaše. Wona tež njezataji, zo je wjelk strašne zwěrjo. Zas a zas skedźbni tež na to, zo wjelk derje wuknje. Tuž měli jemu tak ćežko kaž móžno činić, zo na domjacy skót njepřińdźe.

W diskusiji rjekny dr. Pětr Brězan, zo referentka łžě a bajki šěri. Dale prašeše so, „čehodla bu wjelk k ikonje škitanych zwěrjatow zběhnjeny, hdyž nima njepřećelow nimo čłowjeka?“. Za ranjace ma, zo su wjelčicu Róžeńčanskeje črjódy Marie mjenowali. „Róžant je putniske městno a Serbam wažne. Mam to za blasfemiju napřećo křesćanskim Serbam.“ Ludwig znapřećiwi, zo bě wjelčica mjeno dóstała, jako bě hišće w Minakałskej črjódźe. Přitomni wužichu składnosć prašenja wotbyć, kotrež móžeše referentka zwjetša tež wotmołwić. Peter Rietscher skedźbni na to, zo so dźiwina hinak zadźerži a zdźěla chětro wulke škody načinja. W tym zwisku paruje pomoc knježerstwa hóntwjerjam. Zastupnik krajnoradneho zarjada Michael Unger wobkrući, zo dźiwina w dale a wjetšich črjódach wustupuje. Tilo Žur prašeše so mjez druhim, što činja zamołwići, dyrbjał-li wjelk woprawdźe dźěćo nadpadnyć. Potom změjemy wulku diskusiju a woneho wjelka zatřěla. „Wjelk budźe w Němskej zaso k třělenju swobodny daty, jenož hdy, njemóžemy hišće rjec“, tak Ludwig.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND