Swjedźeń hibićiwych ludźi

póndźela, 01. awgusta 2016
artikl hódnoćić
(0 )
Što dorosćeni mužojo wšitko zdokonjeja, hdyž smědźa so nachwilnje do časa dźěćatstwa nawróćić, dožiwichu hosćo Koćinskeho wjesneho swjedźenja na wčerawšim předstajenju „kotoła pisaneho“. Foto: Alfons Handrik Što dorosćeni mužojo wšitko zdokonjeja, hdyž smědźa so nachwilnje do časa dźěćatstwa nawróćić, dožiwichu hosćo Koćinskeho wjesneho swjedźenja na wčerawšim předstajenju „kotoła pisaneho“. Foto: Alfons Handrik

Mjeztym 16 lět nawjeduje Marija Latowa Koćinski wjesny klub z jeho 27 čłonami. Wčera po zakónčenju wjesneho swjedźenja wona hódnoćeše, zo je so rozsud, přewjesć swjedźeń druhi raz při kapałce wosrjedź wsy a nic na łuce za Koćinu, jako přewšo wunošny wopo­kazał.

Koćina (aha/SN). Nimo 19. raz pospochi do swjedźenja zapřijateho „kotoła pisaneho“ zabrachu sportowe wubědźowanja wažne městno. Tak wubědźowaše so sobotu pjeć mustwow w kopańcy, hdźež wuńdźechu Koćinjenjo před nowej Kulowskej wubranku jako dobyćer. Tež mjez třomi na trawniku za bulom honjacymi dźěćacymi mustwami bě domjace najlěpše. Na woběmaj dnjomaj su tohorunja kehelowali. Dźěći w dwěmaj starobnymaj skupinomaj so runje tak prócowachu kaž žony, z třomi kulemi maksimalnu ličbu drjewow powalić. Terez Reineltec je z 23 kehelemi snadnje před Jenny Markec (21) a Margit Korchowej (20) dobyła. Mjez třiceći mužemi docpěchu hnydom štyrjo 24 kehelow. Mjez nimi přesadźi so Pětr Reinelt před Tobiasom Čórlichom a Joachimom Kostoržom.

Wjele připóznaća žnějachu Koćinske žony, kotrež běchu wjace hač třiceći tykancow a tortow napjekli, kiž su hosćom k dobremu kofejej w přepjelnjenym stanje do programoweho wjerška „kotoł pisaneho“ zesłodźeli. Jědnaćelětnej šulerce Luiza Korchec a Viktorija Langec stej program we wotměnje serbsce a němsce moderěrowałoj. Hižo z prěnim wobrazom pokazaštej wonej na čiłe wjesne žiwjenje. Nic dźěći, ale dorosćeni mužojo dopominachu so hrajkajo na swój čas dźěćatstwa. Serbsce spěwajo je na to 22 dźěći hosći witało.

Fabula lětušeho dwuhodźinskeho „kotoła“ běchu olympiske hry, a dušna so­nina z bajkoweho lěsa zapřija ludźi do wja­corych zajimawych wubědźowanjow. Za předstajenje žortnych, hišće nic olympiskich disciplinow, kaž ze starej wjeru na chošću napřemo lětać, sydom­ jeji nadobo z placawu trjechić a rjad dalšich­ dóstachu akterojo wjele přikleska.

Wjele ludźi wobdźěli so na trochowanju wahi proseća. Najbliže k woprawdźitej waze bě Cyril Jorš z Koćiny, kiž smědźeše sej 28 kilogramow ćežke swinko sobu domoj wzać.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND