Wojerecy (AK/SN). We Wojerecach zwěsćeja dźeń a wjac dźiwich a tajkich kóčkow, kotrež po zdaću nikomu njesłušeja. Na to skedźbni Marlies Holst, zastupowaca předsydka Wojerowskeho zwěrinoškitneho towarstwa, na njedawnym posedźenju měšćanskeje rady. „Na teritoriju města Wojerec je jich w njewobydlenych kónčinach, w zahrodkowych kolonijach kaž tež na ćežko přistupnych ležownosćach něhdźe 400 dźiwich a ničejich kóčkow“, Holst rozłoži. „Wone zbědnjeja a schorjeja, dokelž so dosahajcy njezežiwjeja. Ranja so, natyknu so z infekciski­mi chorosćemi, dóstawaja sćekłosć, koču smorkawu, leukozu, koču mrětwu. Nimo toho maja tchi a wački. Zdźěla tele chorosće tež na čłowjeka přenjesu.“

Wobstajnje rozrostowaca ličba kóčkow wjedźe po słowach zwěrinoškitneho towarstwa k tomu, zo sadistiski wandalizm přiběra. Njeznaći kóčki natřěleja abo samo zatřěleja, dračuja a zwohidźeja je. „Někotři je samo pójsnu, jim kožu wotćahnu abo rozkuskuja. Zapaleja kóčki, mjetaja je žiwe­ do wotpadkow abo zabiwaja je“, Marlies Holst wšitke móžne grawoćiwosće naliči.