Budyšin (aha/SN). Po wopyće Božeje mšě w klóšterskej cyrkwi a rozmołwje w Zelnakec pjekarni w Pančicach-Kukowje nastajištaj so zapósłancaj Sakskeho krajneho sejma Marko Šiman a Alojs Mikławšk (wobaj CDU) wčera z kolesom na puć do Swinjarnje, hdźež staj so w přitomnosći wjesnjanosty Markusa Kreuza (CDU), zamołwiteho za twarstwo klóštra Marijineje hwězdy Daniela Richtera a hospodarskeho nawody klóštra Chrystofa Mikławška z potrjechenymi wobydlerjemi, škodowanymi přez wulku wodu lětsa 23. meje, rozmołwjałoj. Mikławšk, kiž bě hižo na dnju katastrofalneho njewjedra w Swinjarni był, rozłoži na městnje tuchwilny staw zwoprawdźenja trěbnych škitnych naprawow. To rěka, kak hodźi so zaručić, zo so woda z polow wuchodnje wsy při sylnych zliwkach do Klóšterskeje wody wjedźe.