Wozy na Kulowskim róžowopóndźelnym ćahu bywaja kóžde lěto wjetše
Kulow (SN/MWj). Z 22 wulkimi wozami, jednym wjace hač loni, a z njeličomnymi mjeńšimi wobrazami, mjez druhim ze žonjacymi, kotrež běchu hižo minjenu sobotu w měsće widźeć, je so lětuši róžowopóndźelny ćah wčera po Kulowje pohibował. A znowa su sej jón tysacy lubowarjow zbliska a daloka wobhladali. Pječa bě jich něhdźe 10 000. Tomu njeje tež poměrnje sylny wětřik zadźěwać móhł. Tuž sy na kromje hasow nory z Budyšina a Radworja runje tak wuhladać móhł kaž te z Hórkow, Pančic-Kukowa a Šunowa.
Karnewalowy ćah wobkedźbowali su tež zamołwići z hornjeho poschoda radnicy, zwotkelž mějachu dobry wid na torhošćo. Tam poby tohorunja Budyski krajny rada Michael Harig (CDU), kiž bě hakle dźeń do toho Šěrachowski póstniski ćah ze swójskim wozom wobohaćił. Tak tež wón dokładnje hladaše, kotre ideje běchu sej póstniske nory na swojich wozach za Kulowski ćah wumyslili.
