Wojerecy (AK/SN). Po lońšich a lětušich nazhonjenjach chcedźa we Wojerecach tak mjenowany wobydlerski hospodarski plan dołhodobnje dale wjesć. Za to wupraja so mjez druhim měšćanski radźićel Uwe Blazejczyk, kiž je zdobom nawoda za to zamołwiteje wodźenskeje skupiny. „Wobydlerjo so na rozsudach we Wojerecach rady sobu wobdźěleja, tohodla dyrbjeli z etatom pokročować“, wón podšmórny.
Namjety, pjenjezy z tohole wosebiteho etata w měsće a w jemu přisłušacych wsach nałožić, kotrež je wjac hač sto zajimcow na njedawnej dźěłarničce w forumowej žurli Wojerowskeje Łužiskeje hale rozjimało, sahachu wot ponowjenja murje w Parku Jürgena von Woyskeho hač k tomu, postajić dwaceći informaciskich taflow wo kulturnohistoriskich pomnikach města. Hač do přichodneje póndźele móža wobydlerjo hišće wothłosować, za kotre naprawy měli pjenjezy z wobydlerskeho etata wužiwać. Wot měrca potom chcedźa projekty zwoprawdźeć.