Stróža (SN/MWj). Na wosebite wašnje chce zarjadnistwo biosferoweho rezerwata Hornjołužiska hola a haty hromadźe z domizniskim towarstwom Radiška dopomnjenki wobydlerjow z časa dźěćatstwa wokoło Hućiny, Stróže a Olbaskeho jězora zachować. Za to zarjaduja pjatk a sobotu, 24. a 25. januara, w Stróžanskim šulskim muzeju „Korla Awgust Kocor“ kónctydźenske zetkanje w znamjenju stawiznow a stawizničkow. Jeho wuslědki zapřijmuja potom do ponowjenja přirodoweje wučbneje šćežki „Hućinjanske haty a Olba“.
Kaž sobudźěłaćerka zarjadnistwa biosferoweho rezerwata Susanne Bärisch zdźěli, maja za nowy koncept přirodoweje wučbneje šćežki wosobinske dopomnjenki a anekdoty wobydlerjow z Hućiny, Stróže, Zubornički a blišeje wokoliny wažnu rólu hrać. Fota abo na přikład najlubši karpowy recept su tohorunja witane. Wšitke stawiznički a wobrazy chcedźa zezběrać, wobdźěłać a po móžnosći prawje wjele z nich na nowych informaciskich taflach předstajić.