Budyšin (UM/SN). Mjez dźensnišimi Budyšanami drje so lědma štó dopomina, zo měješe Weigangowa něhdy cyle hinaši charakter. Nětko je to normalna dróha předměsta w tak mjenowanej wilowej štwórći z mało zelenym. Něhdy pak bě to aleja z čerwjenymi hłohoncami (Rotdorn) na woběmaj bokomaj. Kaž na mnohich druhich hasach a naměstach je so tež tu w běhu lětdźesatkow wjele zeleneho zhubiło.
Skupina žonow a muži, lěta 2016 jako „Měšćanscy wozelenjerjo“ załožena, pak so z tym wotnamakać nochce. Woni chcedźa přinošować, zo by sprjewine město zaso zeleniše, pisaniše a kćějate było. Skupinje přisłuša wukubłany zahrodnik Olaf Haase, kiž wěnuje so hłownje kulojtym městnam wokoło štomow. Jeho zaměr je, zo wobydlerjo tele městna zwosadźeja a je hladaja. Tak chcedźa witalnosć štomow w měsće polěpšić.
